Iloilo St. Paul’s Hospital, gin-lockdown kasunod sang pagpositibo sa COVID-19 sang 6 doktor

By: JoMaque | June 29, 2020

Iloilo City — Gin-lockdown ang St. Paul’s Hospital Iloilo kagab-i, Hunyo 28.

Ini ang ginkumpirmar ni Regional Inter-Agency Task Force Spokesperson Atty. Roy Villa kasunod sang pagpositibo sa COVID-19 sang anum ka mga medical doctors sang ospital.

Suno sa iya, wala na sang admission sa ospital. Ang tanan nga personnel nga yara sa sulod sang ospital ang strikto nga gin-quarantine.

Sa mensahe ni Villa sa Aksyon Radyo Iloilo, gin-umpisahan ang contact tracing sang Biyernes, Hunyo 26 sang nakuha ang impormasyon sang isa ka pasyente nga nagpositibo sa rapid test pero negatibo sa RT PCR test.

Lakip sa temporaryo nga ginpasiraduhan ang operating room (OR), emergency room (ER) kag out-patient department (OPD) sang ospital.

Wala pa sang ideya si Villa kun tubtob san-o ang lockdown kag posible nga mahibaluan ini subong nga adlaw ukon sa masunod nga inadlaw.

Ginakuhaan pa sang Aksyon Radyo Iloilo sang pahayag ang ospital