Kalibo International Airport, mabukas sang commercial flights halin sa Manila para sa mga LSIs kag repatriated OFWs sugod Hulyo 1

By: JoMaque | June 29, 2020

Aklan — Ginpasugtan sang Aklan Provincial Inter-Agency Task Force on COVID-19 ang Kalibo International Airport nga magbukas para sa commercial domestic flights halin sa Manila sugod sa Hulyo 1 para sa mga locally stranded individuals kag mga returning overseas Filipinos. 

Sa Executive Order Number 28 nga ginpirmahan ni Aklan Governor Florencio Miraflores, gina-require ang mga pasahero nga magpresentar sang medical certificate halin sa government physician, travel authority halin sa PNP kag health declaration card antes magpa-book sang ila flights.

Duha lang ka flights sa kada semana ang pasugtan.  Ang mga airlines nga pahanugutan nga may Manila-Kalibo flights kag vice versa amo ang Philippine Airlines Express, Cebu Pacific Air kag Air Asia.

Ginpahayag ni Miraflores nga pwede makapasakay sang mga pasahero ang airlines pakadto sa Manila halin sa Kalibo bisan LSIs, authorized persons outside residence (APOR), returning OFWs ukon sin-o man nga indibidwal sa kondisyon nga may ipakita nga medical certificate halin sa government health facility.

Magapatuman suno sa gobernador ang airport sang ‘No health declaration card-No exit’ policy sa pag-abot sa terminal.         

COVID-19 free sa subong ang aklan matapos nga wala na sang bag-o nga kaso nga gin-report sa nakaligad nga duha ka semana.