DOH6, nanindugan nga dapat mag-quarantine ang tanan nga gin-swab samtang wala pa ang ila resulta

By: JoMaque | July 2, 2020

Iloilo City — Dapat mag-quarantine, sa balay ukon sa facility man, samtang wala pa sang resulta ang RT PCR test suno sa Department of Health 6.

Suno kay Dr. Renilyn Reyes sang DOH6, ang mga gin-swab amo ang may posible nga risgo nga matapikan sang COVID-19 rason dapat nga mag-quarantine anay.

Indi specific sa Updated Interim Guidelines for COVID-19 testing ang pag-quarantine man sang nga asymptomatic ukon wala sang sintomas nga health care worker apang ‘by princicple’ ini ang dapat nga sundon sang tanan suno kay Dr. Reyes.

Gina-imbestigaran sang DOH6 ang posible cause of infection sa St. Paul’s Hospital lakip ang ginreport pakigkita kag upod sa pagkaun sang doctor nga isa sa mga nagposotibo sa COVID-19 sa doctor halin sa Bacolod City.

Hunyo 26 sang gin-swab ang anum ka mga doctor sa St. Paul’s Hospital nga una gin-report nagpositibo sa COVID-19.

Hunyo 27 sang nakigkita ang isa sa anum ka mga doctor nga nagpositibo sa doctor man nga halin sa Bacolod City.

Suno kay Dr. Ella Mae Divinagracia, infectious specialist sa nasambit nga ospital, nagdul-ong sang mask respirators ang doctor nga naghalin sa Bacolod City.

Hunyo 28 sang naguwa ang laboratory results kag nakumpirmar nga positibo sa COVID-19 ang anum ka mga doctor, lakip ang nakigkita sa doctor nga halin sa Bacolod City.

Nanindugan si Dr. Divinagracia nga wala sang breach sa quarantine protocol bangud may physical distancing man nga gin-observe ang duha ka mga doctor nga nag-upod sa pagkaun.

Dugang niya, una man nga nag-negatibo sa rapid antibody-based test ang personnel nila nga sa ulihi nadiskubrehan positibo sa COVID-19.