By: JoMaque | July 3, 2020

Iloilo City — Kumpirmado nga nagpositibo sa COVID-19 ang pasyente sa isolation ward sang Western Visayas Medical Center sa Mandurriao.

Sa virtual presser sang Department of Health 6 subong nga adlaw, ginkumpirmar ni Dr. Stephanie Abello, pathologist sa WVMC Sub-National Laboratory, nga ang nagpositibo nga pasyente amo si WV 360, 72 anyos nga lalaki nga taga-Igbaras, Iloilo. Indi locally stranded individual (LSI) ukon repatriated overseas Filipino (ROF) ang pasyente, base sa record sang DOH 6.

Dugang ni Dr. Abello, Hunyo 25 sang gindala sa WVMC ang pasyente bangud sa chest pain. Hulyo 1 sang ginkuhaan siya sang swab para sa COVID testing bilang isa sa mga clearances para sa masunod nga medical procedure nga himuon.

Nagguwa subong nga adlaw ang resulta sang RT-PCR test nga positibo sa COVID-19 ang pasyente.

Gin-athag ni Dr. Abello nga gilayon nga ginsaylo sa COVID ward sang ospital ang pasyente.

Samtang gin-lockdown ang portion sang isolation ward sa diin una nga naka-confine ang pasyente para sa decontamination kag clearance agud masiguro nga indi ma-infect ang iban nga pasyente. May isa pa ka pasyente sa isolation ward, pero malayo man ang antad sa nagpositibo, suno kay Dr. Abello.

Naka-PPE man suno kay Abello ang mga nagtatap sa pasyente antes nagguwa ang resulta sang iya RT-PCR test. | via DOH virtual presser

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply