By: JoMaque | July 6, 2020

Iloilo — Wala napunggan sang COVID-19 ang pagpakita sang kapisan kag kabakas sang 27 anyos nga lalaki nga taga-Dumangas, Iloilo agud makabulig sa isig niya kapareho sa tunga sang krisis dala sang pandemya.

Nagaserbe bilang runner si Lucky Alarcon sang Sitio Sabang, Barangay P.D. Monfort North, Dumangas agud magpamakal sang mga nagapanguna nga kinahanglanon sang mga taga-Dumangas halin sang nag-umpisa ang enhanced community quarantine sa Iloilo.

Nag-umpisa lang sa tatlo ang nagpalihog sa iya nga magpabakal sang gatas kag bulong tubtob nga nagdamo kag ginbantugan na siya nga si “Boy Sugo.”

Suno kay Lucky, temporary siya nga nadulaan sang trabaho bangud nagsirado ang mall nga iya gina-obrahan sang ginpaidalom sa enhanced community quarantine ang Iloilo City sang Marso, rason nga nadumduman niya nga mag-volunteer sa pagpamakal sang mga nagapanguna nga kinahanglanon sang iya mga kilala.

Ginabakal niya sa Iloilo City ang mga items nga ginasugo sa iya kag ginapang-deliver sa kada-balay sang mga nagapabakal sa iya sa Dumangas sakay sa iya nga motorsiklo.

Ginpahayag niya nga wala siya sang ginasukot nga amount kag kontento na siya kun pila ang ginahatag sa iya sang iya mga customer. Sa pagkamatuod suno sa iya, nakibot siya sang ginhandaan sang iya mga customers ang birthday sang iya nga bata sang June 15.

Gin-ako niya nga nakabulig sang dako sa ila kinahanglanon sa balay ang mga ginabayad sa iya sang iya nga mga customers.

Subong nga nagbalik na ang iya trabaho, nagasige siya gihapon sa pagpamakal sang ginasugo sa iya. Ginabakal niya ang mga items kun mag-out na siya sa obra kag ginadeliver pagkasunod nga adlaw antes siya magsulod sa trabaho.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply