By: JoMaque | July 7, 2020

Iloilo City — Madamo sang mga theories sa paglupok sa Power Barge 102 sang AC Energy Philippines sa Bo. Obrero, Lapuz sang Hulyo 3.

Pero suno kay Mr. Gabino Ramon Mejia, Head sang Plant Operations, AC Energy Philippines, dapat ma-establisar scientifically kun ano gid ang natabu.

Nag-hire ang kompaniya sang mga independent consultants agud maghimo sang pagtuon sa Power Barge 102. Naka-abot na sa Iloilo ang mga consultants kag ginalauman suno kay Mejia nga matapos ang pagtuon sa sulod sang tatlo tubtob lima ka adlaw. Pagkatapos sini, mahimo sang report ang mga consultants.

Nagpasalig si Mejia nga mangin transparent ang AC Energy Corp kag maga-kooperar sa local government agencies lakip sa national government agud maresolbar ang problema.

Gin-ako ni Mejia nga may ginahimo nga maintenance ang ila mga tinawo sang Hulyo 3 bangud wala man naga-andar ang Power Barge 102 sang amo nga tiun. Gintumod ni Mejia nga maintenance work ang pagpaminta kag pag-welding, pero gin-athag nga may ginapatuman nga precautionary measures gani nakibot sila sang may naglupok nga nagresulta sa oil spill.

Ang PB 102 suno kay Mejia, may unod nga ginabanta 268,000 liters sang bunker fuel (sa 320,000 liters nga capacity). Sa pinakaulihi nga report sang Coast Guard Iloilo, as of 7pm subong nga adlaw, 200,000 liters na ang na-recover kag 68,000 liters ka “fugitive” oil ang tinguhaan nga ma-recover sa sulod sang 10 ka adlaw.

Gin-athag ni Mejia nga may spill boom nga permanente nga nakabutang sa palibot sang barge. Pero posible may naglapaw sa spill boom bangud mabaskog ang huyop sang hangin kag current ang tubig sang natabu ang paglupok.

Nagpasalig naman si Mejia nga magluwas sa pagbulig sa cleanup, may tinawo naman sila nga nagatatap sa mga nag-evacuate bangud sa bahu nga dala sang oil spill.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply