By: JoMaque | July 9, 2020

Iloilo City–Handa ang AC Energy Corp., tag-iya sang naglupok nga power barge 102 sa Bo. Obrero, Lapuz sang Hulyo 3, nga maghatag sang compensation sa mga naapektuhan nga pumuluyo.

Ini ang ginpasiguro ni AC Energy plant operations head Gabino Ramon Mejia.

Pero nakadepende ini suno sa iya sa mangin rules nga iplastar sang Iloilo City government.

Luyag man suno sa iya sang city government nga kumpletuhon anay ang imbestigasyon para mahibaluan gid ang impact sa mga naapektuhan nga pamilya.

THIRD PARTY INVESTIGATOR

Ginalauman naman ni Mejia nga makapagguwa na sang resulta sang imbestigasyon sa masunod nga semana ang third party investigator nga ila ginkuha agud magpangusisa sa natabu.

Lunes suno sa iya sang nag-abot sa Iloilo ang mga imbestigador kag nagsugod sang pagpangusisa.

Nagkuha suno sa iya sang third party investigator ang kompaniya agud indi man mangin bias kag mangin transparent ang imbestigasyon.

Hugot man suno kay Mejia ang ila pagpakig-angut sa city government, Bureau of Fire Protection kag Philippine Coast Guard may kaangtanan sa natabu.

FUGITIVE OIL

Padayon nga ginapangita subong suno kay Mejia ang “fugitive oil” ukon ang bunker fuel nga nakalusot sa spill booms.

Na-contain suno sa iya ang pagtagas sang langis halin sa tangke sang July 3 sang gab-i pero may fugitive oil kag amo subong ang ila ginatutukan.

Ginpa-athag ni Mejia nga may duha ka methods sa pagtinlo sang langis–una, ang “scooping” ukon ang literal nga pag-scoop kag ikaduha ang paagi sa machine nga ginatawag “skimmers.”

Nag-hire suno kay Mejia ang AC Energy sang serbisyo sang Harbor Star, ang oil containment company nga accredited sang PCG kag may tawo man halin sa komunidad nga nagbulig sa pagpaninlo.

Pananglitan may masiplatan nga oil, gilayon suno sa iya nga gina-report sa kapitan sang barangay nga amo naman ang nagapakig-angut sa PCG. Ang PCG amo naman ang nagahimo sang validation sa lugar.

Apektado sang oil spill ang mga coastal barangays sa Iloilo City kag pinakamalala ang epekto sa mga taga-Barangay Mansaya, Bo. Obrero kag Loboc, Lapuz.

May nasiplatan man nga oil sheen sa Dumangas kag oil sludge tubtob sa Tigbauan area.

Gin-report man sang Guimaras provincial government nga may 20 ka barangay nga naapektuhan sang oil spill.

Photo: Pump boats from Iloilo City going to Guimaras Island pass the oil spill that came from the AC Energy Power Barge that reported exploded Friday spilling more than 200,000 litters of bunker oil to Iloilo Strait. Photo taken on Thursday afternoon, July 7, 2020.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply