Mga LSIs, pwede na makasulod sa Western Visayas sugod Hulyo 16 — RIATF spokesperson
By: JoMaque | July 15, 2020
Iloilo City — Matakop subong, Hulyo 15 ang moratorium sa pagpauli sa mga locally stranded individuals (LSIs) sa Western Visayas halin sa iban nga rehiyon.
Suno kay Atty. Roy Villa, spokesperson sang Regional Inter-Agency Task Force, pwede na makasulod sa rehiyon ang mga LSIs halin sa iban nga lugar sugod sa Hulyo 16.
Ginpatuman ang moratorium suno sa iya agud matan-aw kun ano ang dapat hugtan sa pagpauli sa mga LSIs.
Dugang niya nga dapat mga LSIs gid ang mapauli ukon ang mga na-stranded sa iban nga rehiyon bangud sa lockdown halin sang Marso 15 tubtob Hunyo 30.
Dapat man nga may certification halin sa ila pulian nga LGU nga nagakumpirmar nga batunon sila. I-require gihapon ang mga LSIs sang medical certificate kag travel authority halin sa PNP.
Pag-abot sa Western Visayas, ipaidalom sila sa RT-PCR test kag i-quarantine sang 14 ka adlaw ukon tubtob magguwa ang resulta.
Una na ginpahayag ni Iloilo Governor Arthur Defensor Jr., nga mahingyu siya sa National Inter-Agency Task Force nga i-extend ang suspension sa pagbyahe sang mga LSIs sa probinsiya. | Via PM Reports