By: JoMaque | July 16, 2020

Iloilo City — Naga-apelar si Department of Health 6 Director Marlyn Convocar sa mga local officials nga magsunod sa ila advisory angut sa pag-release sa pag-quarantine sa mga indibidwal nga asymptomatic ukon wala sang sintomas sa sulod sang 14 diyas.

Suno kay Dr. Convocar, ‘enabler’ ukon nagahimo sang mga polisa ang national government kasubong sang DOH kag ang Local Government Unit amo ang ‘implementer’ ukon nagapatuman sini.

Ginduso sang DOH ang pagpahanugot sa pag-discharge sa mga asymptomatic sa sulod sang 14 diyas bagud sa limitasyon sa testing capacity sa pungsod.

Suno naman kay Dr. Renilyn Reyes sang DOH6, dapat seguraduhon naman sang doktor nga naga-clear sa asymptomatic individuals nga wala gid man sila sang sintomas nga nabatyagan sa sulod sang 14 diyas.

Nagapati si Convocar nga kulang ang pagpa-athag sa mga local officials rason nagapang-alang alang sa pag-discharge sa mga asymptomatic.

I-edukar sang DOH6 ang mga local officials kag magasapol man sa mga Provincial Health Offices angut sini.

Maga-release ang DOH6 sang supplementary advisory angut sini para sa mg LGUs kag health facilities.

Ano ang posisyon sang WHO?

Sa scientific brief nga gin-issue sang World Health Organization sang Hunyo 17, ginpahayag nila nga mahimo ma-discharge ang mga pasyente sa isolation bisan wala na sang re-test kun :

1.)Para sa mga symptomatic patients – 10 ka adlaw pagkatapos nagsugod ang ila sintomas kag dugang nga tatlo ka adlaw nga wala sila sang sintomas (wala sang trangkaso kag ubo ukon nabudlayan sa pagginhawa)

2.) Para naman sa mga asymptomatic patients – 10 ka adlaw pagkatapos nagpositibo sa COVID-19

Dugang sang WHO, ang detection sang virus ang wala nagabuot silingon nga makalalaton na dayun ang natungdan.

Pila sa mga ginakonsiderar sa transmission risk amo ang sintomas.

Sa masami, 5-10 ka adlaw pagkatapos na-infect sang COVID-19, amat-amat naman nga naga-produce ang natungdan sang antibodies.

Ang ini nga antibodies ang nagapanubo naman sang risgo sang virus transmission.

‘Home quarantine lang anay’

Bisan gin-release na sa facility quarantine, dapat magpadayon naman sa pag-home quarantine ang mga gin-swab nga asymptomatic samtang wala pa sang resulta ang ila RT PCR test.

Ini suno kay Dr. Jessie Glenn Alonsabe, regional epidemiologist sang DOH6.

Suno kay Dr. Alonsabe, dapat hulaton ang negatibo nga resulta antes makabalik sa normal nga pagsinarayo kasubong sang pagbalik sa trabaho.

Nagapati si Director Convocar nga wala naga-conflict sa ila advisory ang pagpadayon sa pag-home quarantine sang mga gin-swab. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply