LTO6, magasapol sa Lunes upod sa PNP sa pag-check sang mga naga-angkasanay sa motorsiklo

By: JoMaque | July 19, 2020

Iloilo City — Wala pa sang may nabaton nga bag-o nga guidelines ang Land Transportation Office (LTO6) halin sa central office para sa pag-angkas sa motorsiklo sang mag-asawa kag pagbutang sang barrier.

Suno kay LTO6 Director Atty. Gaudioso Geduspan, nakabaton sila sang advisory halin sa DILG may kaangtanan sa pagpahanugot na sang angkas apang para lang sa mga mag-asawa ukon mag-partner nga naga-estar sa isa lang ka balay.

Magasapol pa sa Lunes, Hulyo 20 ang LTO6 upod ang PNP agud istoryahan ang himuon nga pag-check kun nagasunod sa guidelines sang DILG ang ginabutang nga barrier sa motorsiklo.

Iga-check man nila ang makita nga naga-angkasanay kun may ara sang marriage contract ukon ID nga nagapamatuod nga mag-asawa kag naga-upod sa isa lang ka balay.

Una na gin-isol sang Joint Task Force COVID Shield sa Hulyo 26 ang deadline sa pag-install sang barrier sa motorsiklo. | via Aksyon Firingline