Sta. Barbara Mayor Rema Somo, nagkumpirmar nga napatay ang ila residente nga nagpositibo sa COVID-19

By: Aine Grace Bravo

STA. BARBARA, Ilo., July 20, 2020 — Ginkumpirmar ni Mayor Rema Somo nga napatay kaina sang aga sa ospital ang ila residente nga una na nagpositibo sa COVID-19.

Gintumod ni Somo si WV 336, 52 anyos nga taga-Brgy. Bolong Oeste.

Sa statement nga ginpaguwa sang alkalde sa iya Facebook account, ginpabutyag niya nga, “Sumugod nga nag-gwa ang RT-PCR Test result ni Patient WV-336 nga Positive sa COVID19 sang July 1 gilayon nga gin-lockdown ang balay sini sa Brgy. Bolong Oeste.

Ang duha sa Anum (6) ka mga close contact ni Patient WV-336 ang nagpositive sa COVID19 santo sa RT-PCR Test result nga gin release sang July 18.
Ang nagpositive amo ang iya 49-year old nga asawa (WV-724) kag ila 8 ka tuig nga bata (WV-723) nga lunsay asymptomatic kag padayon nga naka lockdown sa ila balay.”

Padayon naman nga naka-lockdown ang balay sang iban pa nga pamilya kag duha ka kabulig ni WV 336.

“Sa sini nga mga pagtilaw sa aton sa pandemya sa bilog nga kalibutan, ginpangabay ko gid ang inyo himpit nga pagpangamuyo, kooperasyon kag paghalong para sa aton tanan.

Magsunod gid sa mga protocol kag precautionary measure nga ginasaad sang aton health authorities,” ang pangabay ni Mayor Somo sa mga taga-Sta. Barbara.