By: JoMaque | July 21, 2020

Iloilo City — Ginpasakaan kaso sang pulis ang 12 ka mga indibidwal nga na-angut sa pool party controversy sa bar sa syudad.

Suno kay Captain Shella Mae Sangrines, Spokesperson sang Iloilo City Police Office, paglapas sa Section 9, e sang Republic Act 11332 ukon Mandatory Reporting of Notifiable Diseases and Health Events of Public Health Concern Act ang ginpasaka sa Iloilo City Prosecutor’s Office.

“(e) Non-cooperation of the person or entities identified as having the notifiable disease, or affected by the health event of public concern.”

Ginapamangkot sang Aksyon Radyo Iloilo kun sin-o ang mga ginpasakaan sang kaso apang wala sang available information si Sangrines.

Suno sa Police Station 1 sa City Proper, indi sila makahatag sang ngalan sang mga ginpasakaan sang kaso bangud sang ila bag-o nga polisa sa PNP.

Indi pag-observe sang physical distancing kag indi paggamit sang face mask ang ginhimo nga paglapas sang ginpasakaan sang kaso.

Sa press briefing sa Police Regional Office 6, ginpahayag ni Director Rene Pamuspusan nga walo ka mga indibidwal ang nagtambong sa pool party samtang nagpanyapon naman ang apat ka iban pa.

Nanindugan ang tagdumalahan sang Wanderpool Bar sa Castle Hotel nga nagsunod sila sa mga health protocol kag ang lihok private event nila sa pag-celebrate sa bag-o nga negosyo.

Dugang nila, ang naglapta nga video sa social media ang ginkuha sang Hunyo pa kag wala sang kaangtanan sa mga natabo sa bar.

PNP POLICY?

Base sa PNP Memorandum Circular No. 2020-037 nga ginpirmahan ni PNP Chief Archie Gamboa sang Mayo 20, indi mahimo masugid sa sin-o man ang persanal information sang tagreklamo, biktima, kag suspetsado base sa Data Privacy Act of 2012.

Mahimo lang mahatagan sang amo nga data ang ‘real party-interest’ ukon kun may mandu ang korte.

Sa Section 5 sang Implementing Rules and Regulations sang Data Privacy Act, nasaad nga indi mahimo ma-apply ang amo nga layi kag rules kun ang ginaproseso nga impormasyon para sa journalistic purpose bangud sang freedom of speech, of expression, or of the press. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply