Riverside Medical Center, Inc., dapat magpaguwa sang pagtadlong sa ila advisory nga puno na ang ila facility para sa COVID-19 patients — Bacolod City VM Familiaran

By: JoMaque | July 22, 2020

Bacolod City — Ginkasubo ni Bacolod City Vice Mayor El Cid Familiaran nga nagpatuman sang border restriction ang Iloilo sa mga nagahalin sa ila syudad kag Negros Occidental.

Suno kay Familiaran, posible ang advisory sang Riverside Medical Center, Inc. nga nakalab-ut na sa full capacity ang ila isolation facility para sa mga COVID-19 patients ang ginbasehan nanday Iloilo City Mayor Jerry Treñas kag Iloilo Governor Arthur Defensor, Jr. sa pagmandu sang restriction sa borders sang Iloilo.

Nagtuga suno sa bise alkalde sang panic sa publiko ang advisory nga ginpaguwa sang ospital sang Hulyo 20.

Bangud sini, gintawgan ni Bacolod City Mayor Evelio Leonardia ang management sang ospital kag nahibaluan nga duha lang ang positive cases nga naka-confine. Samtang may mga co-workers sang nurse nga nagpositibo sa COVID-19 nga naka-quarantine man sa isolation facility sang ospital.

Kun basahon suno kay Familiaran ang advisory, “daw kapareho nga puno na ang ila facility sa COVID-19 patients nga indi man ensakto.”

“They owe it to the public to correct the mistake,” suno pa kay Familiaran.

Nagalaum si Familiaran nga ma-istoryahan nanday Mayor Treñas kag Mayor Leonardia ang sitwasyon agud mabawi ang ginpatuman nga restrictions bangud nga maapektuhan sini ang ekonomiya sang Panay kag Negros islands.

Una nga nagpaguwa sang advisory si Mayor Treñas nga nagapatuman sang border restriction sa mga nagahalin sa Bacolod City kag Negros Occidental kag ginsunod man ini ni Gov. Defensor sa mga puerto sang probinsya.

Kasunod sini, nagpaguwa man si Mayor Leonardia sang statement nga nagasirado sang borders sang Bacolod City sa mga nagahalin sa Panay kag Guimaras islands.