Med Tech sa WVSU Medical Center, nagpositibo sa COVID-19

By: JoMaque | July 25, 2020

Iloilo City — Ginkumpirmar sang Department of Health 6 ang pagpositibo sa COVID-19 sang health worker sa WVSU Medical Center.

Suno kay Dr. Ma. Sophia Pulmones, Local Health Division Chief sang DOH 6, med tech nga assign sa Out-patient Department sang ospital ang nagpositibo base sa DOH 6 bulletin sang Hulyo 22. Pero nagbalibad si Pulmones sa pagbuyagyag sang patient number sang nagpositibo.

Gilayon suno kay Pulmones nga naghimo sang contact tracing ang ospital kag naka-quarantine kag nakuhaan na sang swab ang na-identify nga close contacts.

Base man sa resulta sang contact tracing, may exposure ang med tech sa COVID-19 patient nga na-admit sadtu sa WVSU Medical Center.

May mga pasyente man nga COVID-19 positive nga admitted pa sa amo nga ospital.

Nagpaguwa sang advisory ang WVSU-MC paagi sa ila Facebook page nga temporaryo nga gin-untat ang serbisyo sa OPD.

Ginpasiguro man sang ospital sa ila mga kliyente nga na-obserbar ang husto nga health kag safety measures kag ginasunod ang mga infection control guidelines.

Naghingyo sang paghangup ang ospital. | via Firingline