Mga doktor sa Bacolod City, luyag nga ipaidalum sa ECQ ang siyudad bangud sa pagtaas sang COVID-19 cases

By: JoMaque | July 28, 2020

Iloilo City–Nagpadala sang sulat ang mga doktor sa Bacolod City kay Presidente Rodrigo Duterte nga nagahingyo nga ipaidalum sa duha ka semana nga enhanced community quarantine (ECQ) ang siyudad bangud sa pagtaas sang COVID-19 cases.

Sa ila sulat, ginplastar sang mga doktor ang sitwasyon sa Bacolod City.

Ginhinambit sa sulat nga Bacolod City na ang may pinakamataas nga kaso sang COVID-19 sa Western Visayas kag “few steps” na lang agud mangin masunod nga epicenter sang virus.

Dugang pa sa sulat nga indi handa ang siyudad sa “full blast COVID war” bangud sang dyutay nga mga ospital kag limitado nga kapasidad kag equipment.

Ginarekomendar sang mga doktor ang pag-limit sa hulag sang mga tawo sa sulod sang duha ka semana agud mahatagan sila sang kahigayunan nga ma-contain ang mga kaso.

Bangud man sa sulat sang mga doktor sa presidente, ginkanselar ni Iloilo City Mayor Jerry Treñas ang biyahe sang mga fastcraft pa-Bacolod.