By: JoMaque | July 30, 2020

CONCEPCION, Ilo., July 29, 2020 (5:15pm) – Manabat ang sin-o man nga nagalapas sa mga health kag quarantine protocols agud mabatuan ang COVID-19.

Ini ang paandam ni Concepcion Mayor Raul Banias kasunod sang pagkumpirmar nga may mga nakalusot kag naka-abot sa ila banwa kahapon sang kaagahon, Hulyo 28, halin sa Bacolod City.

Ini bisan ginadumilian pa sa subong ang pagbiyahe halin sa Iloilo pakadto sa Negros Occidental kag vice versa bangud sa nagadamo nga local cases sang COVID-19 sa Bacolod City, Negros Occidental kag bisan sa Iloilo City.

Wala sang prior coordination ang pagpauli sang pito ka sakay sa SUV, suno kay Mayor Banias.

Ginsaysay ni Banias sa iya Facebook post nga las-2:30 kahapon sang kaagahon, may nagtawag halin sa Dumangas RORO Port sa ila Municipal Health Officer nga may nag-abot halin sa Bacolod nga mapa-Concepcion. Gin-text suno sa alkalde sang MHO ang port official nga indi magbaton ang LGU kag ginlayagayan ang mga nag-abot nga indi na magdiretso sa banwa.

“Despite this clear warning, this group of 7 in a SUV proceeded to Concepcion and it was only late in the afternoon yesterday that I was informed that they are already in Loong Bukid,” suno sa alkalde.

“Long story short, they were all extracted from Loong Bukid by our Responders and Police and put in Quarantine in our Isolation Facility,” ang dugang ni Mayor Banias.

‘GINAPA-IMBESTIGARAN’

Ginapa-imbestigaran na ni Banias sa hepe sang Concepcion Police Station ang natabu kag ginapatun-an kun pwede makasuhan ang mga nag-abot bangud sa paglapas sa “Quarantine Laws or Ordinances.”

Ginpahanumdom man ni Banias ang tanan nga seryosohon ang Health kag Quarantine Protocols.

“We are serious in our efforts to make our town and even the whole province and our people SAFE and we are determined to prevent the spread of the Covid 19. You violate laws and regulations, you pay for it, and suffer the consequence,” suno pa kay Mayor Banias.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply