By: JoMaque | August 2, 2020

Iloilo — Nagpositibo sa COVID-19 ang duha ka mga private personnel ni Estancia Mayor Melina Requinto.

Ini ang ginkumpirmar ni Dr. Greg Rolan Sumile, Municipal Health Officer sa Estancia.

Suno kay Sumile, lunsay gin-swab sang Hulyo 24 ang 56 anyos nga lalaki nga assistant sang alkalde kag ang 33 anyos nga lalaki nga driver naman niya.

Locally Stranded Individual ang assistant sang alkalde kag sang Hulyo 19 sang nag-abot siya sa Estancia.

Ang driver naman ang nagsugat sa iya pakadto sa quarantine facility sa ila banwa.

Hulyo 31 naguwa ang resulta sang test nga positibo sila sa COVID-19.

Gindala na sila sa isolation facility sa ila banwa.

Gin-swab naman si Mayor Requinto kag naga-quarantine na.

Temporaryo nga siraduhan ang munisipyo sang Estancia bwas, Agosto 3, para sa disinfection.

Magalawig ini sang tatlo ka adlaw, suno kay Dr. Sumile.

‘Ginpahanugutan nga mag-home quarantine’

Ginpahanugutan ang assistant kag driver nga mag-home quarantine pagkatapos nagpirma sa ‘undertaking’ nga istrikto ini nga sundon.

Hulyo 20 sang nag-home quarantine ang duha sa compound sang alkalde. May ara sila sang tag-isa ka balay nga ginteniran para sa quarantine.

Sa pihak sang ‘undertaking,’ nadiskubrehan naman nga wala ini ginsunod sang assistant sang alkalde.

Suno kay Dr. Sumile, nadiskubrehan nga nag-conduct pa sang training sa massage theraphy sa tubtob 50 ka mga indibidwal ang assistant sang alkalde.

Sa compound mismo sang alkalde nag-conduct sang training ang assistant nga lisensiyado man nga massage therapist.

May impormasyon man si Dr. Sumile nga naguwa sa compound kag may gin-istorya man nga iban nga mga indibidwal ang assistant.

Dugang diri, may mga impormasyon man nga nagkadto siya sa iban nga barangay, apang gina-validate pa ini.

Wala naman sang identified close contact ang driver bangud ginsunod niya ang pag-home quarantine.

‘1st local case sang COVID-19 sa Estancia’

Ginkumpirmar ni Dr. Sumile nga na-record ang labing una nga local case sang COVID-19 sa ila banwa.

Ang driver nga wala sang travel history ang ginapatihan na-infect bangud sang iya exposure sa assistant nga naghalin sa Manila.

Asymptomatic ukon wala sila sang sintomas sang COVID-19.

Sa health bulletin sang DOH6 kahapon, Agosto 1, lakip sa 129 ka mga kumpirmado nga kaso nga na-record sa rehiyon kahapon ang 33 anyos nga taga Estancia kag gin-classify siya si WV1335.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply