By: JoMaque | August 2, 2020

San Joaquin — Nagpositibo sa COVID-19 ang 70-anyos nga market vendor sa San Joaquin suno kay mayor Ninfa Garin.

Sa health bulletin nga gin-release sang Department of Health 6 kaina sang hapon, Agosto 1, lakip ang 70-anyos nga lalaki nga taga San Joaquin nga gin-classify si WV 1357 sa 129 confirmed new cases nga na-record sa Western Visayas.

Asymptomatic ukon wala siya sang sintomas sang COVID-19 kag gindala na sa isolation facility sa San Joaquin.

Suno kay Garin, Hulyo 28 sang gin-swab si WV1357 bilang kabahin sang random testing sa mga residente sa San Joaquin.

Ini ang kabahin sang programa ni 1st District Rep. Janette Garin lakip man sa iban nga mga banwa sa first district.

Si WV1357 ang ikaduha nga local case sang COVID-19 sa San Joaquin.

Una nga nagpositibo sa COVID-19 ang nurse nga nagabantay sa ila quarantine facility.

Wala naman sang probabilidad nga may exposure si WV1357 sa una nga local case sa ila banwa suno sa alkalde.

Ano ang source sang iya infection?

Nagapadayon ang contact sang San Joaquin Municipal Health Office agud mahibaluan ang source sang infection ni WV1357.

Nagabaligya sa apat ka dalagko nga mga merkado sa San Joaquin ang nagpositibo.

Ginpa-quarantine sang alkalde ang asawa sang nagpositibo kag ang ila tatlo ka mga bata.

Nag-conduct naman sang disinfection sa merkado ang LGU kag magalawig ini tubtob bwas, Agosto 2.

Naga-apelar si Mayor Garin sa mga pumuluyo sa ila banwa nga padayon nga mag-observe sang minimum health standards kasubong sang pagsuksok sang face mask kag physical distancing agud malikawan nga matapikan sang COVID-19. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply