By: JoMaque | August 3, 2020

Iloilo – Narecord ang labing una nga local case sang COVID-19 sa San Dionisio kag seafarer nga sang nagligad pa nga Enero nakapauli ang nagpositibo.

Ini ang ginkumpirmar ni San Dionisio Mayor Larry Villanueva.

Ang local case amo ang mga COVID-19 patients nga natapikan sang kagaw sa ila locality.

Suno kay Villanueva, Hulyo 23 sang nagpa-swab sa QualiMed Hospital- Molecular Laboratory ang seafarer bangud manugbalik na sa pag-obra.

Hulyo 28 sang nagbalik sa ospital ang seafarer upod ang iya bata kag nahibaluan niya nga positibo siya sa COVID-19.

Naga-isolate na sa pasilidad sa San Dionisio ang nagpositibo.

Wala sang iban nga travel history ang seafarer nga gin-classify si WV1178.

Suno sa alkalde, nagakadto naman sa syudad sang Iloilo si WV1178 para mag-shopping.

Apat ang na-identify nga close contacts niya kag negatibo ang resulta sang ila RT PCR test.

Ginpahayag sang seafarer nga wala siya gin-abisuban sang personnel sa QualiMed Hospital nga mag-quarantine sang nagpa-swab.

May apat ka mga Locally Stranded Individuals sa San Dionisio nga una na nagpositibo sa COVID-19.

‘Nagkadto pa sa belasyunan’

Ginkumpirmar naman ni Mayor Villanueva nga nagkadto pa sa belasyunan sa Ajuy ang seafarer sang Hulyo 25, duha ka adlaw pagkatapos siya gin-swab.

Sa inisyal nga impormasyon, 70 ka mga indibidwal sa belasyunan ang may exposure sa nagpositibo.

Ginakuhaan pa sang Aksyon Radyo Iloilo sang pahayag si Ajuy Mayor Jett Roxas.

Una na ginpahayag sang OFW nga taga Libertad, Antique nga wala man siya gin-abisuhan sang ospital nga mag-quarantine sang nagpa-swab.

Nakabyahe na sa Manila kag manuglakat pakadto sa United Arab Emirates ang OFW nga taga Libertad, Antique sang nahibaluan niya ang resulta sang iya RT PCR test.

May OFW man nga taga Anilao kag Tigbauan nga nagpa-swab sa QualiMed Hospital.

Naka-schedule na sila nga magbyahe sa Manila sang nahibaluan nga positibo sila sa COVID-19. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply