5 close contacts sang 1st local case sang COVID-19 sa Tigbauan, negatibo ang resulta sa RT PCR test – MHO Dr. Josefa Monserate

By: JoMaque | August 4, 2020

Tigbauan (UPDATE) — Negatibo ang resulta sa RT PCR test sang lima ka mga identified high risk close contacts sang labing una nga local case sang COVID-19 sa Tigbauan.

Ini ang ginkumpirmar ni Dr. Josefa Monserate, Municipal Health Officer sa Tigbauan.

Ang lima ka mga identified high risk close contacts niya amo ang iya duha ka kabataan, iya iloy, utod, kag 5 ka tuig nga apo.

Hulyo 30 sang nahibaluan nga nagpositibo sa COVID-19 ang 50 anyos nga babaye nga returning Overseas Filipino Worker.

Sang Pebrero pa nakapauli sa Tigbauan ang nagpositibo nga asymptomatic kag gina-isolate na subong.

Wala na nakabyahe pa sa iban nga lugar ang nagpositibo magluwas sang nagkadto siya sa munisipyo, police station, kag QualiMed Hospital sa syudad sa pagproseso sang iya mga dokumento.

Nagapadayon ang imbestigasyon sang MHO Tigbauan agud matul-id ang source sang infection sang nagpositibo.

Nagapanawagan si Dr. Monserate sa mga pumuluyo sa ila banwa nga likawan ang paguwa sa ila panimalay kun indi man lang importante.

Dugang niya, dapat istrikto man nga i-observe ang minimum health standards kasubong sang physical distancing kag paggamit sang face mask. | via Aksyon Aljohn Torreta