DepEd-Iloilo, nagpasalig nga preparado sa pagbukas sang klase sa Agosto 24

By: JoMaque | August 10, 2020

Iloilo— Preparado ang Department of Education – Division of Iloilo sa pagbukas sang klase sa Agosto 24.

Ini ang pasalig ni Dr. Roel Bermejo, Division Superintendent sa DepEd-Division of Iloilo, duha ka semana antes ang pagbukas sang klase.

Agosto 3 tubtob 7 sang naghiwat sang dry-run sa nagkalain-lain nga mga modes of learning ukon pamaagi sa pag-eskwela nga gina-offer sa kada eskwelahan.

Subong nga semana pa masumiter sang documentation ang mga opisyal sang mga eskwelahan apang sa iniyal nga impormasyon, may concern sa pagdul-ong kag pagkolekta sang mga modules sang mga estudyante.

Depende sa ginatanyag sang eskwelahan, may nagpahamtang sang Module Distribution and Retrieval Center sa mga barangay kag may mga ginikanan man nga ‘nag-volunteer’ nga magkuha kag magdul-ong sang mga modules sa mga eskwelahan.

Sa pinaka-ulihi nga datus, masobra 387,000 ka mga estudyante halin Kindergartern pakadto sa Senior High ang nagpa-enrol sa probinsya para sa School Year 2020-2021 kag indi magnubo sa 70% sa ila ang nagpili sang modular leaning nga pama-agi sa ila pagpadayon sang ila pag-eskwela sa pihak sang COVID-19 threat.

‘Na-print na ang modules para sa una nga semana’

Sa pihak sang pasalig nga preparado ang DepEd-Iloilo sa pagbukas sang klase sa Agosto 24, gin-ako ni Bermejo nga modules para sa una nga semana pa lang ang na-print sang kadam-an sang mga eskwelahan.

Ang eskwelahan ang ma-print sang mga modules para sa una nga bulan sang klase. Magahalin ang pondo nga gamiton sa sa ila Maintenance and Other Operating Expenses ukon MOOE.

Dugang niya, masobra 50% pa lang sang mga manunudlo ang ginpaidalum sa focus training para sa nagkalain nga mga modalities of learning luwas pa sa mga training nga ginahiwat sa ila mga eskwelahan.

Target man sang DepEd nga matapos ang training para sa mga ginikanan ukon guardian nga magaserbe nga tutors ukon learning coordinators. | via Aksyon Aljohn Torreta