By: JoMaque | August 10, 2020

Iloilo City – Dapat panumdumon nga para sa kaayuhan sang komunidad ang pag-implementar sang lockdown.

Ini suno kay Dr. Suzette Labrador, presidente sang Philippine College of Physicians- Western Visayas Panay Chapter angut sa pag-implementar ni Mayor Jerry Treñas sang lockdown sa porsyon sang anum ka mga barangay sa syudad bangud man sang nagadamo nga kaso sang COVID-19.

Suno kay Dr. Labrador, ginahimo ang lockdown agud indi maglapta ang kagaw sa una tubtob ikatatlo nga linya sang depensa.

Ang una nga liya sang depensa amo ang atun kaugalingon kag maobra ini sa pag-observe sang minimum health standards kasubong sang physical distancing kag face mask.

Ang ikaduha nga linya amo naman ang panimalay samtang ang komunidad ang ikatatlo nga depensa.

Ika-apat naman nga linya sang depensa ang mga quarantine facilities kag ika-lima kag pinaka-ulihi ang mga ospital.

Kun na-lockdown ang lugar, dapat batunon ang sitwasyon kag limitasyon kag magpadayon sa mga mahimo ma-obra.

Mahimo ma-obra ang mga madugay na ginatuyo ubrahon kag tion man ini para maka-bonding sa iban pa nga mga miembro sang pamilya.

Mas maayo naman kun makapangaman sa posible ipatuman nga lockdown paagi sa pagpreparar sang supply kasubong sang pagkaun kag bulong .

Importante naman nga indi mag-panic buying kag magbakal lang sang supply nga sarang sa duha ka mga semana.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply