By: JoMaque | August 13, 2020

Iloilo — Ginakuwestyun ni Iloilo Governor Arthur Defensor Jr kun ngaa nakapauli pa sa kabanwahanan ang mga call center agents sa siyudad sang Iloilo bisan nga na-swab sila kag nagahulat pa sang resulta.

Luyag mahibaluan sang gobernador kun bala, gin-abisuhan man sila sang ila employer ukon wala gid sila nagpati sa mga panugyan sa ila.

Suno kay Defensor, nagapadayon ang contact tracing agud mahibaluan kun may ara gid man sang nagpauli sa mga banwa.

Pila ka beses na suno sa iya nagpanugyan ang gobyerno nga mag-quarantine kun napaidalom na sa RT-PCR test.

Dapat suno pa sa gobernador nga abisuhan sang employer ang ila mga empleyado, preparahan ang pag-quarantine kag mag-coordinate man sa mga local government units agud malikawan ang paglapta sang COVID-19.

Una na ginbuyagyag ni Pavia Mayor Luigi Gorriceta nga wala sang koordinasyon ang BPO company nga iQor may kaangtanan sa mga empleyado nila nga nagpauli nga na-expose sa COVID-19 positive.

Kasunod ini sang 14 ka nadugang sa kaso sang COVID-19 sa banwa kag lunsay halin sa iQor.

Wala gid suno sa iya nag-coordinate ang nasambit nga kompaniya sang ginpapauli nila ang pila ka empleyado nga ginpaidalom sa swab test.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply