By: JoMaque | August 15, 2020

ILOILO CITY – Ginreklamo ni Roda Binueza sang La Paz ang lalaki nga nagpakilala miyembro sang Military Intelligence Group kag Criminal Investigation and Detection Group Region 6.

Suno kay Binueza, Hulyo 16 subong nga tuig sang nagkilalahay sila ni Jhaffar Franco Tumamudtamud, 32 anyos nga nagpabutyag nga taga- Sara, Iloilo pero temporaryo nga naga-istar sa Jaro.

Hulyo 17, nagpakilala si Tumamudtamud nga miembro siya sang MIG kag CIDG 6.

Ginsaysay ni Binueza nga ginhambalan siya ni Tumamudtamud nga ara sila sang iya live-in partner sa drug list nga gina-uyatan ni Tumamudtamud kag kinahanglan magbayad sang P2.5 million kada ulo agud ma-clear ang ila mga ngalan.

Naghambal man suno sa iya si Tumamudtamud nga kun indi siya magbayad, “tumbahon” ang iya pamilya.

Nagduda si Binueza sang nakabaton sang mga mensahe paagi sa Facebook nga nagapangtonto si Tumamudtamud.

Suno naman kay NBI 6 Special Investigator Aries Bañares, nagdangup sa ila si Binueza kag nagpangayo sang bulig.

Sa ginhimo nga validation, natukiban nga indi myembro sang MIG ukon CIDG si Tumamudtamud gani gin-subject sa entrapment operation kahapon sang hapon.

Ginpasakaan na sang kaso nga robbery extortion, usurpation kag grave threat in relation to Cybercrime Law si Tumamudtamud.

Ginakumbinser naman ni Binueza ang iban pa nga nabiktima ni Tumamudtamud nga magpakig-angut sa NBI 6 agud mapasakaan pa gid sang dugang nga kaso.

Ginatinguhaan pa sang Aksyon Radyo nga makuhaan sang pahayag si Tumamudtamud may kaangtanan sa akusasyon sa iya.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply