2 Pulis, 1 NUP sa PRO6 Headquarters, nagpositibo sa COVID-19

By: JoMaque | August 18, 2020

Iloilo City — Nagpositibo sa COVID-19 ang duha ka pulis kag isa ka Non-Uniformed Personnel nga na-assign sa Police Regional Office 6 Headquarters sa Camp Delgado.

Suno kay PRO 6 Spokesperson Lt. Col. Joem Malong, gin-swab sang Agosto 15 ang 70 ka mga pulis sa PRO6 bilang kabahin sang ila random testing.

Kahapon, Agosto 17, naguwa ang resulta nga positibo ang tatlo sa amo nga numero.

Ang mga nagpositibo ang mga masunod;

1.) NUP nga babaye nga taga Pavia, na-assign sa Office of the Regional Director

2.) Police Commissioned Officer nga lalaki nga taga Iloilo City, na-assign sa Regional Comptrollership Division

3.) Police Non Commisioned Officer nga babaye nga taga Anilao, na-assign sa Regional Community Affairs and Development Division

Gindala na sa isolation facility sa ila Local Government Unit ang mga nagpositibo nga may mga sintomas nga nabatyagan.

Temporaryo naman nga gin-lockdown ang lugar sa diin naga-duty ang mga nagpositibo.

Ginpa-quarantine man sa PRO6 ang mga identified close contacts sang mga nagpositibo kag natalana sila nga i-swab.

Nagapadayon pa ang imbestigasyon agud matul-id kun sa ano ang source of infection sang mga nagpositibo.

Nagapadayon naman ang operation sang nagkalain lain nga mga opisina sa PRO6 magluwas sa mga gin-lockdown.

Nagpahanumdom si Malong sa publiko nga may transaksyon sa PRO6 ukon sa mga police stations nga magsuksok sang face mask kag face shield bangud mandatory na ini.

Ang tatlo nga nagpositibo ang labing una nga mga confirmed cases sa sulod sang PRO6 headquarters. | via Aksyon Aljohn Torreta