Utility worker sa DPWH-1st District Engineering Office, nagpositibo sa COVID-19
By: JoMaque | August 18, 2020
Iloilo City — Nagpositibo sa COVID-19 ang 40 anyos nga utility worker sa 1st District Engineering Office sa Fort San Pedro, Iloilo City.
Ini ang ginkumpirmar ni Engr. Nonie Viyar, district engineer sa 1st DEO, DPWH.
Suno kay Engr. Viyar, Agosto 14 sang gin-swab ang una nga 40 nila ka mga personnel lakip ang nagpositibo bilang kabahin sang precautionary sa ila opisina.
Kagab-i, Agosto 16, sang naguwa ang resulta nga positibo sa COVID-19 ang utility worker nga taga Brgy. Veteran’s Village, City Proper.
Negatibo naman ang resulta sang 39 ka iban pa.
Natalana dal-on sa isolation facility ang nagpositibo nga may ubo kag nagapalanakit ang tutunlan.
Ginabanta 20 ang identified close contacts sang nagpositibo sa 1st DEO.
Ginpa-home quarantine sila kag natalana man nga i-swab.
Wala sang temporary closure sang opisina sang 1st DEO. | via Aksyon Aljohn Torreta