By: JoMaque | August 19, 2020

Iloilo City — Ginatugyan sang Department of Health6 sa mga Local Government Units ang paghatag sang detalyado nga impormasyon sang nagpositibo sa COVID-19.

Sa press briefer sang DOH6 subong nga hapon, Agosto 18, ginpahayag ni Dr. Jessie Glenn Alonsabe, kalabanan sa mga LGUs ang naga-post sang ila bulletin kag mas updated man ini.

Paagi sa lihok, malikawan man ang ‘redundancy’ kag ‘duplication’ sa pag-post sang impormasyon sang mga nagpositibo.

Wala sang otoridad ang DOH sa mga LGUs nga sa idalum naman sang Department of the Interior and Local Government.

Sugod sang Agosto 14, wala na ginapahibalo sang DOH6 sa publiko ang breakdown kada banwa ukon distrito sa syudad sa diin nagapauli ang nagpositibo kag ang ila demographics kasubong sang edad, sex, kag medical status.

Sa advisory ni DOH6 Director Marlyn Convocar sang Agosto 17, ginahayag niya nga may general instruction ang DOH Central Office sa pag-standardize sang ila template sa health bulletin agud mangin uniform ini.

‘THIS IS NOT MANDATORY’

Gin-ako naman ni Dr. Alonsabe nga indi ‘mandatory’ ang pagsunod sa general instruction sang DOH Central Office angut sa bag-o nga template.

Bisan nahisugtan ang lihok sa video conference sang mga DOH officials sang nagligad nga semana, may mga regional offices nga wala man naga-observe sini kasubong sa MIMAROPA, Bicol Region, Davao Region, kag Central Visayas.

Bisan indi ‘mandatory’, nagdesisyon ang DOH6 nga indi na maghatag sang breakdown kag demographics sang mga nagpositibo.

“This is not mandatory however we also have to follow the standard format of the bulletin as per advised by the (DOH) Central Office in order that (so that) all of the bulletins will have a uniform look. As for the breakdown of cases that we report on the daily basis before, we would like to encourage LGUs most especially our provincial health offices and highly urbanized cities to help us in the dissemination as well as issuance of this bulletin.”

‘7 NA ANG COVID-19 LABS’

Pito na subong ang COVID-19 laboratories sa Western Visayas rason mas madamo na man ang nagasulod nga data sa Regional Epidemiology and Surveillance Unit sang DOH6.

Nag-hire sang mga personnel ang DOH6 para sa RESU apang may gin-deploy man sa ila sa mga probinsya kag HUCs suno kay Dr. Alonsabe.

Madamo nga mga netizens ang nagpabutyag nga indi sila kumporme sa bag-o nga sistema sang pag-report sang DOH6.

Suno kay Atty. Jonie Dabuco, director sang Commission on Human Rights 6, importante nga mahibaluan sang publiko ang banwa ukon distrito sa diin nagapauli ang mga nagpositibo kag ang ila demographics agud makapangaman kag makahimo man sang insakto nga aksyon. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply