2 LSIs nga taga-Carles, gin-hold sa Arevalo Police Station

By: JoMaque | August 25, 2020

Iloilo City — Gin-hold sa Arevalo Police Station ang duha ka Locally Stranded Individuals nga taga-Carles nga nag-abot halin sa Palawan kahapon sang aga, August 24.

Suno kay Police Colonel Alexis Relado, acting Director sang Iloilo City Police Office, las 10:23 kaina sang gin-hold ang duha ka LSIs nga nagsakay sa jeep.

Posible suno sa iya nga “nagsunggod” ang duha bangud wala nasugat sang ila LGU.

Gilayon gin-flash alarm ang kapulisan nga nagabantay sa border control points sa siyudad kag gintutukan ang Jaro area nga posible agyan sang duha ka LSIs.

Pero ginkatingala sang kapulisan kun ngaa sa Arevalo nag-agi ang duha.

Nagpasalamat naman si Relado sa kaabtik kag kaalerto sang kapulisan.

Ginpa-athag naman ni Jacky Golingan, Liaison officer sang LGU Carles nga wala sang notice of coordination halin sa banwa ang duha ka LSIs.

Pero iya gin-ako nga pila ka oras antes nagsakay sa barko, nagtawag ang duha kag nagpahibalo nga mapauli sila pero wala na nakapakig-angut liwat may kaangtanan sa detalye sang ila pagpauli.

Kinahanglan kuntani ang amo nga mga detalye para mahatagan sila sang notice of coordination kag acceptance letter halin sa LGU antes sila pasugtan nga makasakay sa barko.

Bangud sini, ginkatingala ni Golingan kun paano nakasakay ang duha sa barko.

Las sais kahapon sang aga, nag-inform ang duha kay Golingan nga naka-abot na sila sa Lapuz port kag ginpatawag sila makaligad ang 10 ka minutos agud kuntani ma-arrange ang pagsugat sa ila.

Gintawgan sila kag gin-text pero wala na sila nagasabat.

Nahibaluan na lang sang ulihi nga nagmatu-mato ang duha sakay sa public transport tubtob gin-hold sila sang Arevalo police.