Iloilo City — Mahimo ma-release sa facility quarantine ang mga gin-swab kun may negatibo na nga resulta sa RT PCR test apang dapat tapuson nila ang 14 day quarantine sa ila balay.

Ini suno kay Dr. Marie Jocelyn Te, designated spokesperson sa Department of Health 6.

Suno kay Dr. Te, indi kinahanglan magtenir sa pasilidad sa pag-quarantine agud makabulos ang iban apang dapat seguraduhon nga istrikto nga i-observe ang home quarantine.

Nasaad man ini sa DOH Western Visayas CHD Advisory No. 34 nga gin-issue ni Director Marlyn Convocar sang Hulyo 9.

Nasaad sa amo nga advisory nga kinahanglan tapuson sang tanan nga asymptomatic close contacts sang confirmed case ukon sang probable case sang COVID-19 case ang 14 diyas nga pag-quarantine sugod sa petsa sang ila pinaka-ulihi nga exposure sa confirmed ukon probable COVID-19 case.

Base man sa DOH Memorandum No. 2020-0258, ang mga suspect,probable, ukon confirmed case sang COVID-19 nga clinically recovered kag indi na symptomatic ukon wala na sang sintomas kag nakakumpleto na sang indi magnubo sa 14 diyas nga isolation ang mahimo ma-discharge kag ma-tag as recovered bisan wala pa sang RT-PCR ukon antibody testing. Kinahanglan nga i-clear sila sang doctor.

Sa mga asymptomatic ukon wala naman sang sintomas sang COVID-19, mahimo sila ma-release sa pag-quarantine pagkatapos sang 14 diyas. Ini bisan wala pa gin-test ukon wala pa sang resulta sang test.

Paagi sini, makasegurado bangud 10 tubtob 14 days man ang monitoring period suno kay Dr. Te.

Indi ‘specific’ sa DOH memo kag advisory ni Director Te nga dapat mag-quarantine sang 14 diyas bisan may negatibo na nga resulta sang RT PCR test.

ANO ANG GUIDELINES SANG WHO?

Suno sa World Health Organization, ang incubation period para sa COVID-19 ang lima tubtob anum ka adlaw sa average apang mahimo maglab-ot sa 14 diyas.

Ang incubation period amo ang tyempo sang exposure sa virus kag pagsugod sang mga sintomas.

May mga kaso naman nga asymptomatic ukon wala sang sintomas sang COVID-19 ang mga nagpositibo.

Suno naman sa Centers for Disease Control and Prevention, kinahanglan gihapon mag-quarantine bisan may negatibo na nga resulta bangud mahimo mag-develop ang sintomas sa sulod sang duha tubtob 14 diyas pagkatapos sang pinakaulihi nga exposure sa virus.

Base naman sa scientific brief sang World Health Organization nga gin-issue sang Hunyo 17, mahimo ma-discharge ang mga pasyente sa isolation bisan wala gin-test liwat kun:

a.Sa mga symptomatic ukon may sintomas sang COVID-19: 10 ka adlaw sugod sang nabatyagan ang mga sintomas. Dugang diri, kinahanglan may tatlo man ka adlaw nga wala sang sintomas sang COVID-19

b.Sa mga asymptomatic ukon wala naman sang sintomas sang COVID-19: 10 ka adlaw

‘TIMING’

Bisan may negatibo na nga resulta sa RT PCR test, may posibilidad nga wala pa naka-manifest ang mga sintomas ukon wala pa sang nagakaigo nga viral load sa lawas rason wala na-detect sa test.

Ini ang rason kun nga-a importante ang timing sa pag-swab suno kay Dr. Juan Ismael Sumagaysay, infectious disease specialist kag miembro sang Iloilo COVID-19 Task Force, ang grupo sang mga doctor sa syudad kag probinsya sang Iloilo.

Kun may sintomas sang COVID-19, mataas ang yield sang virus sa lawas sa sulod sang tatlo ka adlaw sugod sang nabatyagan ang mga sintomas base sa mga pagtuon (Mataas ang probabilidad nga may nagakaigo na nga amount sang viral load sa lawas para ma-detect sa RT PCR test)

Kun asymptomatic ukon wala naman sang sintomas sang COVID-19, 50% ang yield kun mag-swab sa ika-apat nga adlaw samtang masobra 60% naman sa ika-lima nga adlaw.

Makakuha sang 90% tubtob 100% nga yield kun mag-swab sa ika-walo nga adlaw suno kay Dr. Sumagaysay.

May probabilidad nga makakuha sang false negative nga resulta sa RT PCR test kun indi insakto ang pag-swab sa indibidwal.

Ang false negative amo ang may COVID-19 apang negatibo ang nangin resulta sa RT PCR test. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply