By: JoMaque | August 25, 2020

‘Kululbaan gid sang community transmission.”

Ini ang rason suno kay Dr. Suzette Labrador, Presidente sang Philippine College of Physicians, Western Visayas-Panay Chapter, nga liwat sila nagapangabay sa publiko nga likawan ang pagguwa sa balay kun mahimo pa lang.

Ang masubo suno sa iya bangud may mga tawo nga naga-antus sa severe infection sang COVID-19.

Kadam-an sa mga kaso suno sa iya, mga asymptomatic, “puwede nga upod mo sa jeep ukon iping mo sa tinda ukon ang iban nga tawo nga makasalamuha mo.”

“Ang aton kaugalingon amo ang first line of defense. Diri gid naga-umpisa ang proteksyon batok sa COVID-19. Last line of defense ang ospital. Indi na dapat maglab-ut pa tani sa last line nga depensa,” dugang pa ni Labrador.

PROTEKSYON BATOK SA COVID-19

Ang tawo suno kay Dr. Labrador, may 82% nga risk reduction ukon proteksyon batok sa COVID-19 kun may 1 meter siya nga physical distancing sa iban nga tawo; 94% naman ang proteksyon kun naka-face mask kag may 1 meter physical distancing halin sa tawo nga naka-mask man, 97% ang proteksyon kun may 2 meters nga physical distancing kag naka-face mask kag 99% ang proteksyon kun may physical distancing, naka-face mask kag naka-face shield.

Maproteksyunan pa gid ang kaugalingon kun masami nagapanghugas sang kamot, wala nagatandog sang mata, ilong kag baba agud mapunggan ang pagsulod sang virus sa lawas.

Dapat man pabakaskugon ang immune system paagi sa pagkaun sang prutas kag utan, pag-inom sang kinahanglanon nga tubig kag pagtulog sang indi magnubo sa pito ka oras.

Importante suno kay Labrador nga indi pag-abusuhan ang lawas.

Dapat man panumdumon nga wala sang ginapili ang virus.

14-DAY QUARANTINE BISAN MAY NEGATIVE RESULT NA?

Sa guidelines naman sang Department of Health nga dapat tapuson gid ang 14-day quarantine bisan nga may negatibo na nga resulta sa RT-PCR test, ginpahayag ni Dr. Labrador nga nagapanigurado lang ang ahensiya.

Pero puwede naman kuntani suno sa iya ang 10-11 ka adlaw bangud ini ang life cycle sang virus, “Kun negative na siya, I think okay man na siya pero dapat i-follow ang guidelines.”

Dugang niya, naga-dayalogo sila sa COVID-19 Task Force angut sa posibilidad nga makabalik sa trabaho ang nagpa-test kun may negatibo na nga resulta bisan wala pa natapos ang 14-day quarantine.

Pero importante suno sa iya nga “ma-spell out” gid kun ano dapat nga himuon sa sini nga concern.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply