By: JoMaque | August 27, 2020

Bacolod City — Nagpositibo sa COVID-19 ang lima ka mga agents sang Philippine Drug Enforcement Agency 6 sa Bacolod City, kag nagpositibo man sa COVID-19 ang duha ka mga drug personalities nga gindakop nila.

Suno kay PDEA Negros Occidental Provincial Officer Nicolas Gomez, Agosto 12 sang gin-operate nila ang drug den sa Brgy. Banago, Bacolod City kag anum ang nadakpan nga mga drug personalities.

Ang Brgy. Banago ang ginakabig isa sa mga high risks sa COVID-19.

Nakabatyag sang sintomas sang COVID-19 ang lima sa 12 ka mga operatiba sang Agosto 12 sang gab-i.

Gilayon naman sila nga gin-quarantine kag gin-swab sang Agosto 14.

Agosto 17 sang naguwa ang resulta kag nadiskubrehan nga positibo sila sa COVID-19.

Ang lima nga nagpositibo ang ginabug-osan sang apat ka mga lalaki kag isa ka babaye.

Gindala na sila sa isolation facility kag wala na sang sintomas sang COVID-19.

‘2 drug personalities nagpositibo man’

Bilang kabahin naman sang contact tracing, ginpa-swab man ang anum ka mga drug personalities.

Suno kay Bacolod City Police Office Spokesperson Lt. Col. Ariel Pico, Agosto 23 sang gin-swab ang anum ka mga drug personalities nga napreso sa Police Station 2.

Agosto 24 na sang gab-i sang naguwa ang resulta kag nahibaluan nga 2 ang positibo.

Gilayon man sila nga gindala sa isolation facility kag asymptomatic ukon wala sang sintomas ang COVID-19.

Nagmandu naman si BCPO Dir. Col. Henry Binas nga i-swab ang mga preso ukon personnel sang Police Station 2 kun may sintomas nga mabatyagan.

‘Exposure sa barangay’

Nagapati si Gomez nga na-infect ang personnel nila bangud sang ila exposure sa Barangay Banago.

Sugod sang gin-implementar ang community quarantine, wala na nagapauli sa ila balay ang mga PDEA agents.

Ang iban naman nga mga agents nga yara na nga daan sa ila balay ang wala na gin-require nga mag-report sa opisina.

Naga-quarantine naman si Gomez kag pito ka iban pa sa ila opisina bisan may negatibo na nga resulta sa RT PCR test.

Nagpasalig si Gomez nga magapadayon ang ila drug operation apang dapat proteheran ang kaugalingon agud indi matapikan sang kagaw.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply