Mga LSIs nga taga-Iloilo province, indi na pag-i-require sang negative RT-PCR test result antes pasugtan nga makapauli

By: JoMaque | August 27, 2020

Iloilo City — Indi na pag-i-require nga magpakita sang negative RT-PCR test result ang mga locally stranded individuals nga taga-Iloilo province antes pasugtan nga makapauli.        

Sa advisory nga gin-post sa Facebook page sang Iloilo Provincial Government, nakabutang nga masunod ang probinsya sa DILG Memorandum nga gin-isyu sang Agosto 25.

Nakabutang sa memo nga kinahanglan lang i-accomplish sang mapauli nga LSI ang medical clearance certificate kag travel authority antes magbiyahe.

Nakabutang man sa memo nga ang local government unit nga magabaton ang magahimo sang RT-PCR test sa pag-abot sang LSI.