2 teachers sang private school sa Mandurriao, nagpositibo sa COVID-19; Mga nagpositibo, naka-isolate na — School principal

By: JoMaque | August 30, 2020

Iloilo City — Ginkumpirmar ni Tabucan, Mandurriao Punong Barangay Ronald Montelibano nga nagpositibo sa COVID-19 ang duha ka maestro sang Ateneo de Iloilo sa Mandurriao nga naga-board sa ila barangay.

Suno kay Montelibano, nakuha na sang City Health Office kag naka-quarantine na ang duha ka maestro nga ginabanta naga-edad sang 25-anyos tubtob 26-anyos.

Ginpahayag ni Montelibano nga gin-swab ang duha ka maestro sang tinalikdan adlaw kag naguwa ang resulta nga nagpositibo sila sa virus.

Nagpangabay naman si Montelibano sa iya nga pumuluyo nga indi magpanic kag sundon ang minimum health protocols sang syudad para indi maglapta ang virus.

Dugang ni Montilebano nga kun wala naman sang importante nga kadtuan, magtenir na lang sa balay.

Samtang sa statement nga ginpadala sang principal nga si Herman Lagon, iya ginpahayag nga naka-isolate na ang mga nagpositibo, “They are there in the isolation area of the LGU na. They were in mandated isolation for 17 days already before they were brought to quarantine area. Despite such, the school–which holds full offsite/online classes–continues to regularly and strictly follow health and safety protocols (in the campus) set forth by the DOH and the LGU.”