By: JoMaque | Sept. 5, 2020

Guimaras- Patay ang 49-anyos nga lalaki sang ginsulod sa ila balay sang tatlo ka wala pa makilala nga mga lalaki kag gintiro sa Brgy. Supang, Buenavista, Guimaras las 12 kahapon sang udto, Setyembre 4.

Ginkilala ang napatay kay Miguel Eñano III nga may pilas sa nagkalain-lain nga parte sang iya lawas.

Base sa panaysayon sang witness nga si alyas Inday kay Police Corporal Jemar Gonzaga, imbestigador sang Buenavista MPS, may nagdulog nga motorsiklo kag scooter sa atubang sang ila balay kag ginsugo ang iya nga bata nga buksan ang pwertahan.

Ginbuksan man nila ang pwertahan sang balay sa pagpati nga tinawo sang Guimelco ang tatlo ka lalaki.

Ginkakibot na lang ni alyas Inday sang nagsulod ang tatlo ka mga lalaki nga naka-bonnet, gintayaan siya sang pusil kag ginpangita si Eñano.

Dugang pa ni alyas Inday, nagpanirado pa sang kwarto si Eñano sang nabatian nga ginapangita siya pero ginsulod siya kag gintiro.

Indi pa mapalayag sang mga pulis ang mga anggulo nga ginasundan sa pagpatay sa biktima.

Nagapadayon ang imbestigasyon sang Buenavista police sa natabu.Wala pa man ideya ang mga pulis kun may kaangtanan sa illegal nga druga ang biktima.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply