Lalaki nga ginpatay kag ginlubong sa Antique, nakilala nga taga-Iloilo

By: Aine Grace Bravo

ILOILO CITY, September 11, 2020 — Nakilala na ang lalaki nga ginpatay paagi sa pagtiro kag ginlubong sa Brgy. Funda-Dalipe, San Jose, Antique sang Setyembre 7.

Ginkumpirmar ni Barangay Kagawad Eden Lopez sang Brgy. Bakhaw, Mandurriao nga gin-identify sang iya pamilya si Jerry Bolivar.

Tumandok nga Leganes, Iloilo si Bolivar, pero nakapangasawa sa Bakhaw, suno kay Kagawad Lopez.

Na-identify suno sa iya ang lalaki sa Puma nga sapatos nga iya ginsuksok sang naglakat siya sang Domingo, Setyembre 6.

Sa pagpangusisa sang kagawad, nagpauli sa Leganes sang Domingo si Bolivar upod ang iya bata, pero naglisensya siya nga makadto sa Passi City para magbakal sang inugbulang nga manok apang wala na siya nakapuli.

12 ka tuig nga napreso sa National Bilibid Prison sa Muntinlupa City si Bolivar sa kaso may kaangtanan sa illegal drugs kag lima pa lang ka bulan nga nahilway. | via Dave Bucayan