By: May Ortega/Aine Grace Bravo

ILOILO CITY, September 18, 2020 — Nagapangayo sang kaathagan halin sa Western Visayas Medical Center ang pamilya nga taga-Mandurriao bangud sa ila pagpati, ginpabay-an sang ospital ang bangkay sang ila himata kabangdanan nagpasar.

Sa interview sang Aksyon Radyo Iloilo, ginsaysay ni alias Weng nga Setyembre 12 sang gindala sa WVMC ang pakaisa sang iya bana bangud gulpi lang nahulog sa gina-drive nga trisikad.

Gindeklarar nga dead on arrival ang 64-anyos nga pasyente nga gin-cardiac arrest kag gin-swab santu sa protocol sang ospital. Ginkabig man nga COVID-19 suspect ang pasyente bangud sang madamo nga kaso nga na-record sa Mandurriao.

Las nuebe sang gab-i sang Setyembre 13 nagguwa ang resulta sang COVID-19 test sa pasyente kag negatibo siya sa virus.

Setyembre 14 sang hapon, ginkuha sang Gegato-Abecia ang bangkay sa ospital pero naghambal suno kay Weng ang punerarya nga indi na nila ma-cremate ukon ma-embalsamar ang bangkay bangud “nagpasar” na kag makabig na nga hazardous.

Bangud sini, ginputos sang plastic ang bangkay kag gindirekta na lubong sang Setyembre 15.

Masubo suno kay Weng bangud wala na nahamyang man lang ang bangkay.

Ginpahayag ni Weng nga base man sa hambal sa iya sang taga-Gegato, “wala kaagi freeze” ang bangkay.

Dugang niya wala gid sang may ginhimo ang ospital sa bangkay nga duha ka adlaw nagtenir sa morgue tubtob nakuha sang punerarya.

Gintinguhaan sang Aksyon Radyo Iloilo nga kuhaon ang pahayag ni Dr. Joseph Dean Nicolo, medical center chief sa WVMC, apang wala siya naka-reply sa ginpadala nga text message kag wala man nakasabat sang gintawagan.

Sang nagpakig-angut ang Aksyon Radyo Iloilo sa opisina ni Dr. Nicolo, gintugyan nila ang pagsabat kay Mr. Richard Saltin, designated spokesperson sa COVID-19 response sa nasambit nga ospital.

Ginkuhaan man sang pahayag sang Aksyon Radyo Iloilo si Saltin apang wala pa siya nakahatag.

Wala man siya nagasabat sang gintawagan sang Aksyon Radyo Iloilo. | via Aksyon Hotline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.