By: JoMaque | September 24, 2020

Iloilo — Ginareklamo sang mga taga-Maasin ang gin-alegar pagdala ni Father Oscar Andrada, anay kura paruko sang banwa sang P1.8 million nga donasyon nga para kuntani sa pagpaka-ayo sang simbahan.

Suno kay Maasin Mayor Francis “Ansing” Amboy, personal siya nga nagpakig-istorya sa Arsobispo sang Jaro parte sa isyu batok kay Father Andrada. Ini bisan pa nga nagsulat na ang Parish Pastoral Council sa arsobispo.

Tatlo ka tuig na nga nagbiya bilang parish priest si Father Andrada sa Maasin pero tubtob subong wala pa naaksyunan ang reklamo.

Antes naghalin, mismo si Father Andrada suno sa alkalde ang nag-anunsiyar sa meeting upod sa Sanggunian kag mga department heads nga ibilin niya ang natipon nga P2-million nga donasyon sa masunod nga kura paruko.

Sa meeting naman upod sa Parish Pastoral Council, Parish Finance Council kag Apostolic Council, gin-anunsiyar man suno kay Amboy ni Father Andrada ang natipon nga donasyon kag ihatag niya ang P300,000 para sa fiesta sang banwa.

Pero sang nagpungko na ang bag-o nga parish priest, nahibaluan nga P200,000 lang ang ginbilin ni Father Andrada samtang “ang P1.8-million, gindala niya,” suno kay Amboy.

Sang ginpamangkot si Father Andrada, naghambal siya una nga “ara lang sa iya ang kuwarta kag ihatag niya kun magsugod na ang obra sa simbahan” pero sang ulihi, gin-deny naman niya nga may P1.8 million nga donasyon nga ara sa iya.

Sa pagpangusisa ni Amboy, natukiban man nga nagadirekta kay Father Andrada ang mga donasyon kag ang second collection sa misa lang ang nagakadto sa simbahan.

Sang ginpakig-angutan naman sang Aksyon Radyo Iloilo si Father Andrada, gin-deny niya ang akusasyon.

Suno sa iya, wala siya nagpa-amot sa pumuluyo sang Maasin para sa construction sang simbahan.

Dugang niya, nakahambal siya sa Parish Finance Council nga mahatag siya sang P2-million halin sa iya personal nga bulsa kun magpatindog sang bag-o nga simbahan.

Ginhinambit niya man nga ang P200,000 nga ginbilin niya sa nagbulos sa iya naghalin man sa kaugalingon niya nga bulsa.

Ginkwestyon man niya kun paano magka-budget nga P2-million kun wala pa sang plano para sa ipatindog nga simbahan.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply