Iloilo City Gov’t, magahingyo sa national IATF nga ibalik sa GCQ ang siyudad sugod bwas, Setyembre 28
By: JoMaque | Setyembre 27, 2020
Hingyuon sang Iloilo City Government sa Inter-Agency Task Force ukon IATF nga ibalik sa General Community Quarantine ukon GCQ ang siyudad umpisa sa Lunes, Setyembre 28.
Suno kay COVID-19 team spokesperson Jeck Conlu, magapadala sang sulat si Mayor Jerry TreƱas sa IATF nga naga-request nga ibalik sa GCQ ang Iloilo City subong nga weekend.
Ginpahayag ni Conlu nga naka-istorya na ang alkalde kanday IATF Chairperson Secretary Delfin Lorenzana kag Department of the Interior and Local Government Undersecretary Epimaco Densing III may kaangtanan sa pagsaylo sa protocols.
Ginhimo ini sang alkalde suno kay Conlu kasunod sang sinapol kaupod ang City COVID team kag business community.
Gintumod nga rason sang alkalde nga wala na sang bag-o nga kaso sang COVID-19 sa pila ka lockdown barangays sa syudad.
Hingyuon man sang alkalde sa IATF nga pahanugutan ang syudad nga makabaton sang inbound passengers sa kondisyon nga nakapaidalom sa RT-PCR test ang pasahero, 72 oras antes ang scheduled flight.