EO may kaangtanan sa pagguwa-sulod sa Guimaras, ipatuman sa masunod nga semana — Vice Gov. Gando
By: JoMaque | Setyembre 29, 2020
Guimaras — I-implementar sang Provincial Government sang Guimaras sa masunod nga semana ang bag-o nga pagsulundan sa pagbiyahe pagguwa kag pasulod sa isla.
Base sa Executive Order Number 67, kun maglapaw sa duha ka beses kada semana ang pagguwa sa Guimaras, pasugtan lang liwat nga makaguwa sa isla kun may negatibo nga resulta sang Rapid Diagnostic Test.
Batunon naman pabalik sa Guimaras bisan nakatenir sa guwa sang isla sang tatlo ka adlaw ukon masobra pa. Pero sa liwat nga pagguwa, kinahanglan magpakita sang negatibo nga Rapid Test result agud makabiyahe.
Ginbutang ang testing center sa mga puerto, suno kay Gando, agud madasig makita.
Ginadiskusyunan pa kun librehon ang test. Pero kun indi makasarang sa pagbayad, handa suno sa iya ang probinsya nga mabayad sang Test.
Limitado gihapon ang pagsulod sa Guimaras, suno kay Gando. Magluwas sa mga taga-Guimaras, pasugtan lang nga makasulod ang mga nagatrabaho sa isla, kun mag-transport sang basic goods kag kun may emergency. | via BBB