Ilongga nga taga-Janiuay, isa sa mga pambato sang Pilipinas sa 2021 Tokyo Olympics

By: JoMaque | Oktubre 8, 2020

Iloilo — Bugal sang Janiuay, Iloilo ang Filipina boxer nga si Irish Magno nga na-qualify sa 2021 Japan Olympics sa Women’s Flyweight (51kg).

Kasunod ini sang iya kadalag-an sa 2020 Asian & Oceanian Olympic Boxing Qualifying Event sa Amman, Jordan sang Marso subong nga tuig.

Tumandok sang barangay Tamu-an si Magno kag una nagpasimpalad sa national open boxing event sang 16 anyos pa lang siya kag yara sa 4th year high school sang 2008.

Wala siya nagdaug sa nasambit nga hampang apang ginkuha siya sang national team sang Pilipinas bangud sang iya potensyal.

Ginpahayag ni Magno nga siya ang ginpadala sang national team bilang tiglawas sang Pilipinas sa Olympic Qualifying Event sa Amman, Jordan sang Marso sa diin nakasumpong niya ang tiglawas sang Hong Kong, India, kag Tajikistan.

Si Magno ang ikaapat nga Filipino athlete, ikaduha nga boxer kag labing una nga Filipina boxer nga na-qualify sa Tokyo Olympics.

Nagpangayo naman sang suporta ang atleta paagi sa pagpangamuyo, ilabe pa nga subong, paagi man sa online ang iya training bangud sang pandemya.