Lalaki, gintiro-patay sa Tigbauan
By: JoMaque | Oktubre 12, 2020
Iloilo —
Patay ang 44 anyos nga lalaki sang gintiro sa Barangay sa Cansilayan, Tigbauan, Iloilo las 12:50 subong nga hapon.
Ginkilala ang biktima kay Joel Bedonia sang Barangay Nanga, Guimbal, Iloilo
Suno kay Major Rolando Araño, hepe sang Tigbauan Police Station, nagasakay si Bedonia sa iya motorsiklo sang ginbanggaan sang wala makilal-an nga suspetsado kag gintiro.
Wala pa nahibaluan kun papuli na ang biktima sang natabo ang insidente.
May pilas sa ulo kag lawas ang biktima dugang pa ni Araño.
Padayon pa ang imbestigasyon sang pulis sa motibo sa krimen.
Wala sang malain nga record sa barangay
Wala sang malain nga record sa Barangay Nanga, Bedonia.
Ini ang ginkumpirmar ni Punong Barangay Gregorio Gensola sang Barangay Nanga.
Suno sa kapitan, wala man sang kontra sa Bedonia. Apang ginpahayag niya nga may ginreklamo sa barangay nga solterito si Bedonia sang nagligad nga mga binulan nga nagapangaluyag sa iya bata.
Gilayon man nga na-areglo ang reklamo dugang pa sang kapitan.
May tatlo ka kabataan si Bedonia kag nagatrabaho bilang nurse sa Guimbal District Hospital ang iya nga asawa.