By: JoMaque | Oktubre 13, 2020

GUIMARAS — Nagalaum pa ang 3rd year college student nga si Alyas Nonoy sang Guimaras nga mabalik ang iya kwarta matapos nag-transaction sang laptop sa online shopping app nga Shopee pero wala nag-abot.

Suno kay Nonoy, P15,000 ang balor sang iya ginbakal nga laptop.

Gin-contact niya ang seller paagi sa Viber kag nagsugtanay sila nga mabayad siya una sang P7,000 bilang down payment kag dugangan sang P8,000 sa tiun nga mag-abot na ang laptop.

Nakapadala na si Nonoy sang P7,000 paagi sa Pera Padala. Pero nag-message ang seller nga ginhingadlan ni Nonoy nga Global Gadget Shops nga na-base sa Laguna nga full dapat ang iya bayaran antes ipadala sa iya ang laptop, gani nagdugang siya bayad sang P8,000.

Ginsukot man siya sang P2,000 nga shipping fee kag iya man ginbayaran.

Pagkasunod nga adlaw suno kay Nonoy, gin-contact siya sang delivery agent kag ginhambalan nga ginpunggan sang Bureau of Customs ang produkto kag kinahanglan nga magbayad sang P8,000 bilang bayad sa tax kag insurance.

Gin-istorya ni Nonoy ang seller pero ginhambalan siya nga refundable man ang P8,000 rason nga nagpadala siya liwat sang kwarta.

Nag-contact liwat suno pa kay Nonoy ang delivery agent kag naghambal nga ginapabayad pa gid siya sang P7,000 bilang penalty bangud delay ang iya bayad sa P8,000 nga bayad sa tax kag insurance.

Ginbayaran niya ang kantidad bangud luyag na niya mabaton ang laptop nga gamiton para sa ila online class.

Sang Sabado, Oktubre 10, ginpabayad siya liwat sang P10,000 para ipadala na ang laptop sa airport, dugang pa ni Nonoy.

Nagpamahog pa suno sa iya ang supplier nga indi pag-ihatag ang laptop kag indi pag-i-refund ang kwarta kun indi siya magbayad sang P10,000. Pero naghambal na si Nonoy nga wala na siya sang kwarta.

Sa kabug-usan, P32,000 na ang iya napadala nga kwarta, pero wala gihapon sang laptop nga nag-abot.

Yara pa suno kay Nonoy ang ila conversation sang seller kag delivery agent lakip na ang resibo sang money remittance nga makapamatuod sang iya ginbayaran. | Via PM Reports

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply