By: Aine Grace Bravo/Ariel Solacito, Aksyon Radyo Iloilo

ILOILO, October 16, 2020 — 18 ka beses na nga gintay-ug sang linog ang Iloilo kag Antique halin kagab-i, Oktubre 15, tubtob kaina sang aga–siyam diri ang na-record sa San Joaquin, Iloilo halin lang las otso tubtob las 11 sa aga.

Ang pagtay-ug nabatyagan pila ka oras matapos ang sunud-sunod nga linog halin kagab-i nga nagsentro sa San Joaquin kag Miag-ao, Iloilo kag Anini-y, Antique.

Base sa earthquake information No. 1 sang PHIVOLCS, na-record ang epicenter sang linog sa East sang San Joaquin, Iloilo nga may kabaskugon nga magnitude 4.5, las-8:27 subong nga aga.

Tectonic ang origin sang linog nga may kadalumon nga 11 kilometros.

Instrumental Intensities:

Intensity II – Bago City and Sipalay City, Negros Occidental; San Jose City, Antique;

Intensity I – Iloilo City; Valderama, Antique.

Samtang las-8:32 naman sang aga sang liwat nga gintay-ug sang magnitude 4.4 nga linog ang West sang San Joaquin.

Las-8:41 sang aga, gintay-ug naman sang magnitude 4.4 nga linog ang West sang San Joaquin. Tectonic ang origin sang linog nga may kadalumon nga isa ka metro.

Las-8:59 sang aga, gintay-ug sang magnitude 3.4 nga linog ang East sang San Joaquin.

Las-9:05 sang aga, nabatiyagan ang 3.4 magnitude nga linog sa West sang San Joaquin kag nasundan pa gid sang magnitude 3.2 las-9:19 sang aga.

Las 9:58 naman nabatyagan ang magnitude 3.6 nga linog sa amo nga banwa.

Las 10:01, na-record ang magnitude 2.8 nga pagtay-ug sa San Joaquin gihapon.

Las 11:45, nalista man ang magnitude 2.8 nga linog sa amo gihapon nga banwa.

Halin las 10:47 kagab-i tubtob las nuebe subong nga aga, 18 ka beses na nga naka-record sang linog ang PHIVOLCS sa Iloilo kag Antique.

EARTHQUAKE SWARM

Ginpa-athag ni Mr. Elmer Relota sang PHIVOLCS-Antique nga makabig nga earthquake swarm ang mga linog kun mabatyagan sa isa lang ka location.

Nagalawig ini sang tubtob isa ukon duha ka semana kag wala nagalapaw sa magnitude 5 ang kabaskugon.

Mas maayo suno kay Relota kun naga-release sang puwersa bisan gamay lang sang sa wala gid sang nabatyagan nga pagtay-ug kag gulpi lang maglinog sang mabaskog.

Gindugang niya nga ang tsunami, ma-trigger lang sang linog nga nagabaskog sang magnitude 6.5 ukon mas mabaskog pa kag sa dagat ang epicenter. | Via PHIVOLCS

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.