ISCOF-Dingle Campus, nagtukod sang fact-finding committee agud mag-imbestigar sa gin-report ‘fake’ negative RT PCR test result nga ginsumiter sang ila personnel

By: JoMaque | Oktubre 21, 2020

Dingle (UPDATE) — Nagtukod sang fact-finding committee ang tagdumalahan sang Iloilo State College of Fisheries-Dingle Campus agud mag-imbestigar sa gin-report ‘fake’ negative RT PCR test result nga ginsumiter sang ila personnel.

Suno kay Dr. Tessie Ortizo, campus administrator sang ISCOF-Dingle Campus, ipatawag nila ang natungdan nga personnel bwas, Oktubre 21, agud makapa-athag.

Oktubre 1 tubtob 14 sang nag-sick leave ang natungdan nga personnel kag sang nagbalik na sa pag-duty, ginpangitaan siya sang negative nga RT PCR test result.

Nanotisyahan ang ‘irregularities’ sa mga signatories ukon nakapirma sa dokumento rason gin-verify ini sang ISCOF-Dingle Campus sa Western Visayas Medical Center.

Ginpahayag ni Dr. Stephanie Abello, chief sang WVMC Sub National Laboratory nga ‘fake’ ang test result kag indi sila ang nag-issue sang amo nga dokumento.

Ginkumpirmar ni Dr. Ortizo nga may personnel sila nga kasubong ang ngalan sa gin-issue nga advisory sang WVMC SNL nahanungod sa ‘fake’ negative RT PCR test result.

Ginatinguhaan sang Aksyon Radyo Iloilo nga makuhaan sang pahayag ang natungdan nga personnel. | via Aksyon Aljohn Torreta