Drug surrenderer sa La Paz, patay sang gintiro sang riding-in-tandem sa Oton

By: Aine Grace Bravo, Aksyon Radyo Iloilo

OTON, Ilo., October 21, 2020 — Patay ang drug surrenderer sang gintiro sang riding-in-tandem sa Brgy. Alegre pasado las-10 kaina sang aga, Oktubre 21.

Suno kay Alegre, Oton Punong Barangay Pedro Panique, ginsulod sang suspetsado ang biktima nga si Aquiles Po sa ginateniran niya nga bodega kag gintiro sang lima ka beses.

Halin sa area sang banwa sang Oton ang riding-in-tandem, kag nagpalagyo sa area sang Brgy. Sta. Cruz, Arevalo.

Sa inisyal nga impormasyon, may apat ka pilas sa lawas kag may pilas man sa agtang ang biktima.

Ginkumpirmar naman ni PCPT Jason Pancha, hepe sang Oton Police Station, nga napatay ang biktima nga residente sang Brgy. Baldoza, La Paz.

Samtang suno kay Baldoza Punong Barangay Jonathan Javellana Jr., nag-surrender sadto si Po sa Oplan Tokhang kag ginpaidalum man sa drug rehabilitation.

Wala na sang impormasyon ukon monitoring ang mga barangay officials sang Baldoza nga may kaangtanan sa illegal nga druga si Po.

Ginabanta anum ka bulan pa lang nga nagatenir sa Alegre, Oton ang biktima nga nagabantay sang compound sang lending company. | via Aljohn Torreta