By: Aine Grace Bravo, Aksyon Radyo Iloilo

ILOILO CITY, October 29, 2020 – Nagpadulong sa opisina ni Gov. Arthur Defensor, Jr. si former Iloilo City Councilor Plaridel Nava kahapon sang aga, Oktubre 28, agud i-reklamo ang engineer nga na-assign sa Bids and Awards Committee Technical Working Group sang Kapitolyo.

Suno kay Nava, Agosto subong nga tuig samtang yara pa siya sa Estados Unidos, nagtawag ang iya staff kag nagpahibalo nga may nagkadto nga “contractor” sa ila opisina kag naghambal nga luyag “ihatag” sa ila ang isa ka proyekto sa Kapitolyo.

Si Nava ang naga-finance sang mga proyekto.

Base sa paathag sang staff ni Nava, nagpangayo sang initial amount nga P30,000 ang amo nga tawo.

“Abi sang staff ko, siya ang contactor. Abi ko man, sa pag-intiende ko sa pagtawag sang staff ko, nga siya ang contractor. Sa mind ko, basi indi na siya makasarang mag-obra, ipasa niya sa amon, kami ma-finance or kami ma-obra,” suno kay Nava, rason nga gin-aprubahan niya ang paghatag sang kwarta.

Suno pa kay Nava, “hambal niya sa staff ko, napa-reimburse niya ang iya gingasto kuno sa bidding.. bid docs.”

Sang nakabalik sa Pilipinas sang Setyembre, ginsapol ni Nava ang iya mga staff kag ginpamangkot sang update sa proyekto. Gintawgan man sang iya staff ang amo nga tawo, pero nagrason siya nga, “ka dugay sang notice to proceed sa lamesa ni governor.”

Sang nagligad nga semana, liwat nga ginpa-check ni Nava sa Kapitolyo kun ano na ang status sang proyekto kag didto natukiban nga madugay na ginpirmahan ni Gov. Defensor ang notice to proceed.

Gintumod nga proyekto ang repair and renovation sa Sports Complex sa diin ang contractor nga naka-base sa Culasi, Antique ang nagdaug.

Ginpa-komprontar ni Nava sa iya staff ang amo nga tawo, kag natukiban nga indi siya contractor kundi engineer sa BAC TWG.

“Ang contactor subong, gina-pressure niya nga ihatag ang project sa amon… Wala man ko ya lagas sa contractor because in fairness sa iya, wala gid man siya sang kahilabtanan dira,” suno pa kay Nava.

Luyag ni Nava nga mabalik ang P30,000 nga gin-advance sang engineer.

Ginpabutyag sang anay konsehal nga may mga dokumento ang ila opisina nga makapamatuod nga nahatagan sang kuwarta ang engineer.

Ginpahibalo ni Nava si Gov. Defensor “bilang amay sang probinsya” agud “matinluan niya ang Kapitolyo sang mga tawo nga pareho sang engineer nga ni.”

Nagpasalig ang gobernador nga imbestigaran ang reklamo, suno kay Nava. | via BBB

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.