By: Aine Grace Bravo/May Ortega, Aksyon Radyo Iloilo

Iloilo City–“Paano nga kabahin siya [Jeffrey Celiz] kay at that time ang nagalagas sang mga durugista ang PDEA, wala to ya ang military ah di ba? Paano siya mag-depenetrating agent sang military man. Gasakit gid ang buot ko. All the while ga-trust sa iya [si Boyet] amo gale na ya? Gainit ang ulo ko ah.”

Ini ang matigdas nga pahayag ni Mrs. Candelaria Regalado, iloy sang ginpatay nga si Miriam Regalado-Odicta kag ugangan ni Melvin “Boyet” Odicta, ginkilala sadto sang PDEA6 nga drug group leader, sa expose ni Jeffrey Celiz nga nangin kabahin siya sang kampanya sang gobyerno kontra illegal nga druga.

Sa hearing sang senado angut sa isyu sang red tagging sang Nobyembre 3, nangin resource person si Celiz nga una na nag-ako nga siya si ka Eric Almendras kag nagtudlo sa mga miembro sang Makabayan bloc nga kabahin sang komunista nga grupo.

Sa amo man nga hearing, ginpahayag ni Celiz nga ang National Intelligence Coordinating Agency (NICA) ang nangin handler siya sa pag-infiltrate sa Odicta Grug Group.

Suno kay Mrs. Regalado, “ulihi na nag-ulpot” si Celiz sa grupo sang iya umagad.

Sa claim ni Celiz sa Senate hearing, ginpahayag niya nga “upod sila nagdaku” ni Odicta.

Ginpahayag ni Mrs. Regalado nga ginmuno pa niya ang iya anak nga si Miriam kag iya umagad kun ngaa ara si Celiz “nga madamo na sang kontra.”

“Gulpi lang siya nag-abot da. That time si Boyet poderoso. Nagpangayo siya shelter kay damo siya (Celiz) kontra. Pagkapatay sang mag-asawa wala pa gani isa ka tuig nga ara siya da,” pahayag ni Mrs. Regalado.

Dugang niya, “Grabe si Jeffrey, waay ko magdumdom nga amo na himuon ya sa mag-asawa. Amo na siya gale?”

Suno pa kay Mrs. Regalado, nakahibalo man sadto si anay Iloilo City Mayor Jed Patrick Mabilog nga nagakadto si Celiz kay Odicta.

Si Celiz ang nagserbe sadto nga spokesman kag Executive Assistant for Political Affairs ni Mabilog.

GIn-ako ni Regalado nga naglain gid ang iya buot sa pinanghambal ni Celiz, “ginhimo niya shield si Boyet.”

Para kay Regalado “scripted” ang pinanghambal ni Celiz.

2016 sang ginpatay ang mag-asawa nga Odicta.

Nagkadto pa suno kay Regaldo sa hamyang sang mag-asawa si Celiz, “kay nasubuan man siya ‘kuno’.” | via Aksyon Hotline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.