By: JoMaque | Nobyembre 4, 2020

Manila — Gin-ako ni self-confessed former rebel Jeffrey Celiz alyas Ka Eric Almendras nga ang Odicta Drug Group sa Iloilo City ang iya ‘gin-project’ bilang kabahin sa kampanya kontra illegal nga druga sang gobyerno.

Sa hearing sang Senate Committee on National Defense and Security, Peace, Unification and Reconciliation sa isyu sa red-tagging subong nga adlaw, Nobyembre 3, ginpahayag ni Celiz nga ang National Intelligence Coordinating Agency (NICA) ang iya nangin ‘handler’ sa pag-infiltrate sa Odicta Drug Group.

Dugang niya, upod sila nga nagdako sang ginpatay nga si Melvin ‘Boyet’ Odicta nga ginatudlo sang Philippine Drug Enforcement Agency nga drug group leader.

“Mr Chair, Mr. Senate President kung gusto po ninyong lantaran dito. Personal po kami na magkakilala ni Boyet Odicta nung maliliit pa kami. I grew up in Iloilo City. The Odicta Group is the particular… Yeah, the project is about them. Hindi ko po sasabihin ang buong project na iyon kasi marami ang madadamay dito na mga pangalan. It was blown out accidentally Mr. Chair, Mr. (Senate) President.”

Ginkumpirmar naman ni NICA Director General Alex Paul Monteagudo nga gingamit nila si Celiz sa kampanya kontra illegal nga druga.

Ginkwestyon ni Senador Panfilo Lacson, chairman sang nasambit nga komitiba, ang kaangtanan sang paggamit sang NICA kay Celiz sa kampanya sa illegal nga druga bangud nalawagan siya ni Presidente Rodrigo Duterte nga kabahin sa iya narcolist sang 2016.

Suno kay Monteagudo, nangin partner nila ang Armed Forces of the Philippines kag gingamit si Celiz bangud prayoridad ni Duterte ang kampanya kontra illegal nga druga.

Ginpamangkot man ni Lacson si Monteagudo kun ang kaangtanan ni Celiz sa kampanya kontra illegal nga druga ang kabahin sa gihapon sang pag-cover sa iya.

“Actually sir, we have partners with AFP… when the president took over sir, his priority is drugs. That’s why it is really drugs, illegal drugs.”

Nagpatawag sang hearing si Lacson bangud sa redtagging ni Lt. Gen. Antonio Parlade Jr., commander sang AFP Northern Luzon Command sa mga kongresista sa Makabayan bloc kag pila ka mga celebrities nga may kaangtanan sa illegal nga druga.

Wala nagtambong sa hearing ang Makabayan bloc.

Ginatinguhaan sang Aksyon Radyo Iloilo nga makuhaan sang pahayag ang NICA angut sini, apang wala pa sila nakahatag.

‘Kaya nag-cover up po ako’

Ginpahayag ni Celiz nga gingamit niya ang ngalan nga Ka Eric Almendras bangud sang iya “covert operations.”

Dugang niya, ginbuyagyag niya ini sa publiko bangud ginbuyagyag sang CPP-NPA nga drug personality ang source sang NTF-ELCAC kag ni Lt. Gen. Parlade.

Si Lt. Gen. Parlade sa approval man sang NTF-ELCAC ang nagpresentar kay Ka Eric sa media sang nagligad nga semana.

Ginkumpirmar sang ulihi ni Celiz nga siya si Ka Eric.

Sang 2016, nangin spokesperson si Celiz ni former Iloilo City Mayor Jed Patrick Mabilog nga kasubong niya ginlawag man ni Duterte nga kabahin sang iya narcolist.

Sa interview naman sang Aksyon Radyo Iloilo kay Lt. Gen Parlade sang nagligad nga semana, ginpahayag niya nga 2017 sang na-meet niya si Celiz.

Dugang niya, aktibo sa gihapon ang involvement ni Celiz sa wala gintumod nga kampanya kontra illegal nga druga.

2016 sang ginpatay sang wala makilal-an nga mga suspetsado si Odicta kag ang asawa niya sa Caticlan Jetty Port. | via Aksyon Aljohn Torreta/Senate hearing

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply