By: JoMaque | Nobyembre 5, 2020

Iloilo City — Wala naka-coordinate ang National Intelligence Coordinating Agency sa Philippine Drug Enforcement Agency 6 sa ila pag-handle self-confessed former rebel Jeffrey Celiz bilang kabahin sang kampanya kontra illegal nga druga.

Suno kay Ms. Ma. Graziella Tanaleon, spokesperson sang PDEA6, wala sila sang records natuhoy diri kag wala man sila naka-agi transaksyon kay Celiz sa kampanya kontra illegal nga druga.

Ang PDEA ang lead agency sang gobyerno sa kampanya kontra illegal nga druga.

Sa senate hearing sa isyu sang ‘redtagging’ sa mga kongresista sa Makabayan bloc sa ila ginpahayag kaangtanan sa CPP-NPA, gin-ako ni Celiz alyas Ka Eric Almendras nga ang Odicta Drug Group ang iya ‘gin-project’ sa Iloilo City bilang kabahin sang kampanya kontra illegal nga druga sang gobyerno.

Dugang pa ni Celiz, ang NICA ang iya nangin ‘handler’ sa nasambit nga operation.

Ginkwestyon ni senador Panfilo Lacson, chairman sang Senate Committee on National Defense and Security, Peace, Unification and Reconciliation, ang pagkalakip ni Celiz sa narcolist ni Presidente Rodrigo Duterte.

Nagdepensa naman si NICA Director General Alex Paul Monteagudo nga partner nila ang Armed Forces of the Philippines kag ang prayoridad nila amo ang kampanya kontra illegal nga druga.

Gintinguhaan sang Aksyon Radyo Iloilo nga makuhaan sang pahayag ang Police Regional Office 6 angut sini apang gina-refer nila sa National Task Force to End Local Communist Armed Conflict.

Nagpakig-angut man ang Aksyon Radyo Iloilo sa NICA para sa dugang nga pahayag apang wala pa sila nakahatag. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply