By: JoMaque | Nobyembre 7, 2020

“Drawing nga istorya. Indi mapatihan. Daku nga insulto sa intellect sang mga Ilonggo. Daku nga insulto sa mga tawo nga nagtinguha sa away kontra sa druga.”

Ini ang pahayag ni anay Iloilo City Councilor Plaridel Nava sa pagserbe ni Mr. Jeffrey Celiz bilang deep penetration agent kag nangin “star witness“ pa sang National Task Force to End Local Communist Armed Conflict (NTF-Elcac).

Si Celiz nga nagpakilala man bilang si ka Eric Almendras ang nagtestigo sa Senado kag nag-angut sa mga progresibo nga grupo kag party-list groups bilang “fronts” sang CPP-NPA-NDF.

Sang ginpamangkot kun ngaa nangin testigo siya sang gobyerno bisan pa nga nalakip siya sa drug list ni Presidente Rodrigo Duterte sang 2016, ginpahayag ni Celiz nga kabahin siya sang confidential nga “government project” sa druga pero wala na siya nagtuad sang mga detalye.

Suno kay Nava, “kun parte sa druga, indi mo maintuan ang mga tawo sa siyudad [sang Iloilo]. Kilalahay na di. Indi mo mainto ilabe na kun public figure ka.”

Ginplastar ni Nava nga ginkuha ni sadto anay Mayor Jed Patrick Mabilog si Celiz agud magbato kay Mr. Manuel Mejorada nga nagatrabaho naman sa amo nga tiun kay Mr. Rommel Ynion nga nakasumpong ni Mabilog sa pagka-mayor sang 2013 elections, “Kaluluoy si Jed kay Ynion sang 2013. Si Mejorada ang ginkuha ni Ynion. Indi kapanagang si Jed. Kun baba-anay ang kapital kag armas, makabato si Jeffrey kay Mejorada.”

Ginpahayag ni Nava nga ayuhay pa sila ni Mabilog sadto kag yara pa siya sa meeting sang may nagrekomendar sa former mayor nga kuhaun si Celiz tubtob nangin spokesman sang ulihi ni Mabilog.

Naglainay sanday Mabilog kag Nava sang 2014 bangud sang isyu sa traffic lights. Sugod sadto nangin vocal critic na sang Mabilog administration si Nava. Si Nava man ang nagbuyagyag nga nakabaton si Mabilog sang P30-million halin sa drug group leader nga si Melvin Odicta para sa iya kampanya.

2015 sang nagguwa ang “white paper” nga naga-alegar sang “Nava-Golez crime syndicate.” Nalakip sa white paper si Nava kag negosyante nga si Nelson Golez kag gintudlo nga media support sang “sindikato” ang Aksyon Radyo Iloilo kag Panay News.

Bug-os ang pagpati ni Nava nga sanday Mabilog kag Celiz ang yara sa likod sang amo nga white paper.

Suno kay Nava, “Kun espiya siya that time, ngaa wala niya gin-include ang mga drug personalities before kanday “Dragon” kag “Buang?” nga nagatumod sa mga ginpatay nga drug group leaders nga sanday Odicta kag Richard Prevendido.

Ang away kontra sa druga suno sa konsehal, wala natutukan sa panahon sang administrasyon nanday former Presidents Gloria Arroyo kag Noynoy Aquino kag natabu lang sang nagpungko na si Duterte, “Daku nga butig nga espiya siya. The very people nga nag-away sa druga amo ang gin-away niya. Diin ka imo kakita DPA nga nagatum-ok sa mga tawo nga nag-away sa druga?” dugang pa ni Nava.

Ginpahayag ni Nava nga desperado lang ang militar nga matum-ok ang mga cause oriented groups kabangdanan ginbaton nila si Celiz nga testigo, “Wala sila choice kundi batunon si Jeffrey. Gusto nila nga tunlon lang naton. Gifted siya sa pag-manufacture sang istorya. Wala ko gasiling nga gabinutig siya dira sa CPP NPA [issue] pero ang ginahambal niya is not only incredible, the witness himself is not credible. Indi siya masaligan.”

Kumbinsido si Nava nga ginhimo ini ni Celiz para sa survival.

Gin-ako ni Nava nga may nagpalapit na sa iya kag nagpabutyag man siya sang kahanda nga maghambal parte kay Celiz kun may kaangtanan sa illegal nga druga sa siyudad. | via Aksyon Hotline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply